اسلام آباد (مانیٹرنگ ڈیسک)گزشتہ روز نجی ٹی وی کے صحافی و اینکر مطیع اللہ جان پر وفاقی محتسب برائے خواتین کشمالہ طارق کے دفتر میں ان کے حکم پر اہلکاروں کے حملے کی ویڈیو سامنے آگئی ہے ۔ کشمالہ طارق کے حکم پر اہلکاروں کے حملے کی وجہ یہ بتائی جا رہی ہے کہ کشمالہ طارق دوران انٹرویو مطیع اللہ جان کے چبھتے ہوئے سوالات پر سیخ پا ہو گئی تھیں اور جواب نہ دے سکنے پر غصے میں ان پر حملہ کروا دیا۔
مطیع اللہ جان اور نجی ٹی وی کی ٹیم کے ساتھ لڑتے ہوئے کشمالہ طارق کی ویڈیو بھی منظر عام پر آگئی ہے ۔ ویڈیو میں صاف سنا جا سکتا ہے کہ کشمالہ طارق کہہ رہی ہیں کہ ان کے کیمرے پکڑ لو اور کوئی یہاں سے باہر نہ جا سکے، یہ انٹرویو نہیں چلے گا۔ کشمالہ طارق کے اس حکم پر اہلکار صحافی پر پل پڑے ۔ اس دوران کشمالہ طارق اہلکاروں کو حکم دیتی رہیں کہ دروازے بند کر کے ان سے کیمرے چھین لو کر گرفتار کر لو۔
