اسلام آباد(این این آئی)وزیرمملکت برائے داخلہ طلال چوہدری نے کہاہے کہ آئندہ عام انتخابات میں عمران خان اور بلاول بھٹو زرداری مل کر بھی ہمارا مقابلہ نہیں کرسکتے۔سماعت کے بعد سپریم کورٹ کے باہر میڈیا سے بات کرتے ہوئے وزیرمملکت برائے داخلہ طلال چوہدری نے کہاکہ ہم نے سندھ میں پیپلزپارٹی کی حکومت بننے کی حمایت کی، خیبرپختون خوا میں اکثریت نہ ہونے کے باوجود بھی تحریک انصاف کو حکومت بنانے کا موقع دیا
تاہم دونوں نے اپنے اپنے صوبوں میں کوئی کام نہیں کیا ٗ آئندہ انتخابات میں ہم عوام کے پاس اپنی 5 سالہ کارکردگی لے کر جائیں گے اور عمران خان بلاول بھٹو زرداری سے مل کر بھی ہمارا مقابلہ نہیں کرسکیں گے۔ انہوں نے کہاکہ سینیٹ میں جس کے پاس اکثریت ہے اسی کا چیئرمین سینیٹ ہونا چاہئے اورجمہوری اصولوں کے مطابق (ن) لیگ کے سینیٹرز کی تعداد سب سے زیادہ ہونے کی وجہ سے چیئرمین سینیٹ بنانے کا حق بھی ہمارے پاس ہی ہے۔
