اسلام آباد (این این آئی)وزیراعظم شاہد خاقان عباسی نے کہا ہے کہ سابق وزیراعظم اور مسلم لیگ (ن) کے صدر میاں محمد نواز شریف کے خلاف کوئی ثبوت پیش نہیں کیا جا سکا ٗاس کے باوجود اگر کوئی انہیں سزا دینے پر بضد ہے تو ہم یہ جنگ لڑنے کیلئے تیار ہیں ٗایک شخص سابق وزیراعظم ہے ٗعدالتوں میں پیش ہورہاہے ٗ پھر بھی ضروری ہوا تو نام ای سی ایل میں ڈال دینگے ٗ نوازشریف سے متعلق عدلیہ کا فیصلہ متنازع تھا ٗ مخصوص حالات میں اسمبلیوں کی مدت ایک سال تک بڑھائی جاسکتی ہے

اس حوالے سے آئین میں شق موجود ہیے ٗ آئندہ انتخابات 31جولائی سے قبل ہو جائینگے ٗ آئین میں تمام اداروں کی حدود مقرر ہیں جس کے مطابق ہر ادارے کو اپنا کام کرنا چاہیے۔ گزشتہ روز نجی ٹی وی کو دیئے گئے انٹرویو میں وزیر اعظم نے کہا کہ نواز شریف گرفتاری کے لئے تیار ہیں۔ وزیر اعظم نے کہا کہ ایک شخص سابق وزیراعظم ہے اور عدالتوں میں پیش ہو رہا ہے، پھر بھی ضروری ہوا تو نام ای سی ایل میں ڈال دیں گے۔وزیراعظم نے کہا کہ نواز شریف سے متعلق عدالتی فیصلہ اچھا نہیں تھا، متنازع تھا ٗکیا اس فیصلے کا دنیا میں کہیں حوالہ دیا جا سکتا ہے۔انہوں نے کہا کہ مخصوص حالات میں اسمبلیوں کی مدت ایک سال تک بڑھائی جا سکتی ہے، اس حوالے سے آئین میں شق موجود ہے۔وزیر اعظم نے کہا کہ نیب ایک ادارہ ہے اور حکومت بھی ایک ادارہ ہے، دونوں اپنا اپنا کام کر رہے ہیں۔شاہد خاقان عباسی نے امید کا اظہار کیا کہ آئندہ انتخابات 31 جولائی سے قبل ہوجائیں گے جبکہ ان کے وزارت عظمیٰ کے امیدوار وزیراعلیٰ پنجاب شہباز شریف ہوں گے۔انہوں نے کہا کہ سعودی عرب میں پاکستانی افواج کسی جنگ کا حصہ نہیں ہو گی ٗ یہ معمول کا حصہ ہے جو تربیتی مقاصد کیلئے ہے۔