اسلام آباد (مانیٹرنگ ڈیسک) عوامی مسلم لیگ کے سربراہ شیخ رشید احمد نے کہا کہ نواز شریف نے آبیل مجھے مار کی پالیسی اختیار کر رکھی ہے یہ تاحیات نااہل ہوگا اگر قوم نے اسے نااہل ہونے کے بعد سیاسی شہید کہا تو وطن کیلئے شہید ہونے والے اپنے لئے کسی اور نام کی تجویز کرلیں گے۔ حکومت سردیوں میں بجلی ٗگرمیوں میں گیس اور بہار کے تین ماہ میں عوام کو دھواں دیتی ہے۔
اتوار کے روز نجی ٹی وی سے گفتگو کرتے ہوئے عوامی مسلم لیگ کے سربراہ شیخ رشید احمد نے کہا کہ نواز شریف نے آ بیل مجھے مار کی پالیسی اختیار کی ہوئی ہے۔ ان کا برا وقت شروع ہوچکا ہے یہ تاحیات نااہل ہونے جارہے ہیں فوج اور عدلیہ کو برا کہنے والا ملک کا غدار ہے۔ اومان اور ایرانی چابہار کی بندرگاہوں پر جس طرح انڈیا قدم جما رہا ہے ہمارے لئے فکر کرنے کا مقام ہے ۔ ملک کے غدار نہیں بچ سکتے نواز شریف عدلیہ بچاؤ تحریک نہیں بلکہ اپنے لئے جیل بچاؤ تحریک چلا رہا ہے۔ حکومت سردیوں میں بجلی اور گرمیوں میں گیس دیتی ہے اور بہار کے تین مہینوں میں دھواں دیتی ہے۔ پنجاب میں حکومت اور وزیراعلیٰ ن لیگ کا ہے جلسے تو اچھے ہونے ہیں۔ نواز شریف کو جلسوں کے قابل بھی نہ چھوڑنا یہ تو نہیں ہوسکتا چالیس سال سے برسراقتدار رہا ہے۔ پی ٹی آئی نے بھی 25 ‘ 30 جلسے کئے ملک میں جلسوں جلسوں کی سیاست نہیں، سینیٹ میں خرید و فروخت کی منڈی لگی ہوئی ہے۔ ایک ایک ارب روپے کے ممبر تیار ہورہے ہیں۔ مشاہد حسین پرویز مشرف کا سب سے بڑا لوٹا ہے جو شام کومسلم لیگ ق کے جنرل سیکرٹری تھا اور 24 گھنٹے میں نواز شریف اس کو سینیٹ کی سیٹ کا ٹکٹ دیتا ہے راتوں رات پارٹیاں تبدیل کرنا خرید و فروخت نہیں ہے تو کیا ہے۔ تمام صوبوں میں بھی منڈی لگی ہوئی ہے ملک میں جس دن مفاد پرستوں کے شو ختم ہوجائے گا اس دن ملک کے حالات بہتر ہوجائیں گے۔ انہوں نے کہا کہ سکھر میں شام کو ہندوؤں کے مندر پر لوگوں کو ذوالفقار علی بھٹو مرنے کے بعد بھی نظر آتا ہے
اور بھٹو کو دیکھ کر شفا مل جاتی ہے یہ وہ ملک ہے جہاں پر کینسر ‘ ہیپاٹائٹس کے تعویز فروخت ہورہے ہیں یہاں بکنے والوں کی منڈی لگی ہوئی ہے جس دن عوامی شعور پیدا ہوگیا اس روز سب ٹھیک ہوجائے گا جعل سازوں کے سمندر میں نوسربازوں کے ڈبے میں موجود افراد ظاہر ہوں گے تب قوم کو سمجھ آئے گی۔ اگر نواز شریف شہید ہوگیا تو وطن کیلئے شہید ہونے والے کہیں گے کہ ہمیں شہید کی بجائے کچھ اور کہا جائے۔شیخ رشید نے کہا کہ عمران خان کے سپریم کورٹ سے متعلق بیان سے اتفاق نہیں کرتا سپریم کورٹ نے نواز شریف کیس پر درست فیصلہ دیا۔ آئندہ الیکشن میں مسلم لیگ (ن) اور پی ٹی آئی میں مقابلہ ہوگا۔ اگر قوم ملک کے چوروں ‘ ڈاکوؤں‘ خائن افراد کو اپنا لیڈر تسلیم کرتی ہے تو ملک کا اللہ ہی حافظ‘ ہم دیگ سے مکھی نہیں کھا سکتے۔ اس ملک میں سینیٹ انتخابات کیلئے جس پارٹی نے بھی منڈی لگائی وہ ملک دشمن اور جمہوریت کیلئے ناسور ہے۔ بلوچستان میں جو ہوا اس سے جمہوریت کو نقصان ہوا۔
