مظفر آباد /اسلام آباد (مانیٹرنگ ڈیسک)آزادکشمیر ٗنتھیا گلی اور گلیات میں شدید برف باری، سیکڑوں گاڑیاں پھنس گئیں۔محکمہ موسمیات کے رپورٹ کے مطابق مالم جبہ میں سب سے زیادہ 3 فٹ برف باری ریکارڈ کی گئی جبکہ آزادکشمیر، نتھیا گلی اور گلیات میں شدید برف باری کی وجہ سے راستے بند ہوگئے جس کے نتیجے میں تقریباً 800 گاڑیاں اور سیکڑوں سیاح پھنس گئے۔

آزادکشمیر کے چار اضلاع کا زمینی رابطہ راولپنڈی اور اسلام آباد سے منقطع ہوگیا ٗ مظفرآباد، باغ، نیلم، اور جہلم ویلی سے اسلام آباد، پنڈی اور لاہور جانے والی سیکڑوں گاڑیاں پھنس گئی ہیں۔برف باری کی وجہ سے پھنسے افراد میں سے ایک خاتون سعدیہ نے نجی ٹی وی سے گفتگو کرتے ہوئے کہا کہ سیکٹروں گاڑیاں اور لوگ گزشتہ کئی گھنٹوں سے پھنسے ہوئے ہیں۔انہوں نے بتایا کہ برف باری انتہائی شدید ہوئیٗ ڈرائیورز نے ایندھن ختم ہونے کے ڈر سے انجن بند کردیے ہیں اور ہیٹر بھی نہیں چل رہے۔انہوں نے بتایا کہ بچے بھوک سے رو رہے ہیں اور آس پاس کوئی ہوٹل بھی نہیں جبکہ موبائل فونز کی بیٹریاں بھی ختم ہورہی ہے۔خاتون کے مطابق برف ہٹانے اور راستے کلیئر کرانے کا کوئی انتظام نظر نہیں آرہا اور نہ ہی برف ہٹانے کے لیے کوئی مشینری استعمال کی جارہ ہے۔محکمہ موسمیات کے مطابق مری میں اب تک 1 فٹ سے زیادہ برف باری ہو چکی ہے ٗکالام میں 6 انچ، زیارت میں 3 انچ برف باری ہوئی ہے۔ اسلام آباد میں زیرو پوائنٹ کے مقام پر 52 ملی میٹر بارش ریکارڈ کی گئی ہے۔محکمہ موسمیات کے مطابق مری گلیات اور پہاڑی علاقوں میں برف باری کا سلسلہ رات گئے تک جاری رہے گا جبکہ میدانی علاقوں میں بارش کا سلسلہ آئندہ 12 گھنٹوں میں ختم ہو جائے گا۔محکمہ موسمیات کے مطابق گلگت بلتستان میں بارش اور برف باری کا سلسلہ 2 روز تک جاری رہنے کا امکان ہے۔