لودھراں(مانیٹرنگ ڈیسک) لودھراں کے حلقے این اے154کے ضمنی انتخاب کا میدان (آج) سجے گا ، پی ٹی آئی کے علی ترین اور ن لیگ کے پیراقبال شاہ میں کاٹنے کامقابلہ متوقع ، حلقے میں میں چار لاکھ 31 ہزار ووٹرز حق رائے دہی استعمال کریں گے،338 پولنگ اسٹیشنز اور

1043 پولنگ بوتھ قائم کئے گئے ہیں۔ تفصیلات کے مطابق حلقہ این اے 154 لودھراں میں ضمنی انتخابات کا میدان (آج) سجے گا ، (آج) پیر کوہونے والے الیکشن میں چار لاکھ 31 ہزار ووٹرز حق رائے دہی استعمال کریں گے۔ جن میں 2 لاکھ 36 ہزار 496 مرد اور ایک لاکھ 94 ہزار 506 خواتین ووٹرزشامل ہیں۔ 338 پولنگ اسٹیشنز اور 1043 پولنگ بوتھ قائم کئے گئے ہیں جن میں سے چھ انتہائی حساس اور 41 حساس قرار دیئے گئے ہیں۔حلقے میں پیپلزپارٹی کے مرزا محمدعلی بیگ سمیت 10 امیدوار مدمقابل ہیں تاہم اصل مقابلہ پی ٹی آئی اور ن لیگ کے درمیان ہوگا۔ حلقے میں ن لیگ اپنی ہاری ہوئی سیٹ واپس لینے کیلئے ایڑی چوٹی کا زور لگا رہی ہے۔ وزیرمملکت عبدالرحمان کانجو نے ناراض رہنما ؤ ں کو بھی منالیا ہے۔دوسری جانب پی ٹی آئی بھی جیتی ہوئی سیٹ کھونا نہیں چاہتی۔ نااہلی کا سامنا کرنے والے جہانگیرترین کے صاحبزادے علی ترین نے اپنے پہلے الیکشن میں کامیابی کے لئے دن رات ایک کررکھا ہے۔ پارٹی چیئرمین عمران خان سمیت دیگر رہنما بھی مدد کو پہنچے۔ الیکشن مہم اپنی جگہ حتمی فیصلہ حلقے کے عوام نے کرنا ہے۔