اسلام آباد(مانیٹرنگ ڈیسک)مقبوضہ جموں وکشمیر میں بھارتی چھائونی پر حملے میں دو فوجی اہلکار ہلاک ، متعدد زخمی،ہلاکتوں کی تعداد میں اضافے کا امکان۔ تفصیلات کے مطابق مقبوضہ جموں و کشمیر میں جموں شہر کے نواح میں قائم بھارتی فوجی چھائونی’’سنجوان‘‘پر حملے میں 2بھارتی فوجی ہلاک جبکہ متعدد زخمی ہو گئے ہیں، ابتدائی اطلاعات کے مطابق متعدد زخمی فوجیوں کی حالت تشویشناک ہے جس سے ہلاکتوں میں اضافے کا امکان ظاہر کیا جا رہے۔ مقبوضہ جموں و کشمیر کے عوام بھارت سے آزادی کی
تحریک چلائے ہوئے ہیں جب کہ قابض بھارتی فوج کے خلاف آئے روز مسلح کارروائیاں بھی جاری ہیں۔ سنجوان چھائونی میں حملہ آوروں نے اندر گھس کر فائرنگ کردی جس کے نتیجے میں 2 فوجی ہلاک اور 4 زخمی ہوگئے‘ ہلاک ہونے والوں میں بھارتی فوج کا ایک جے سی او مدن لال بھی شامل ہے۔حملہ آور اس وقت چھائونی میں موجود ہیں جہاں قابض بھارتی فوج کے ساتھ ان کا مقابلہ جاری ہے۔ بھارتی میڈیا رپورٹس کے مطابق حملہ آوروں کی تعداد 3کے قریب ہے اور چھائونی میں فوجیوں کی رہائشی بیرکوں میں داخل ہو چکے ہیں۔
