لاہور ( این این آئی) وفاقی وزیر ریلوے خواجہ سعد رفیق نے کہا ہے کہ آصف زرداری کو جمہوریت کے لبادے میں اراکین کی خرید و فروخت کا گھنائونا کھیل نہیں کھیلنے دیں گے،گالیاں دو الزام لگائو یا سازش کرو تمہیں
شرمناک جمہوریت کا دور واپس نہیں لانے دیں گے۔ انہوں نے سماجی رابطے کی ویب سائٹ ٹوئٹر پر اپنے جاری کردہ بیان میں کہا کہ مسلم لیگ (ن) اور دیگر جمہوری قوتیں ہارس ٹریڈنگ کا راستہ روکیں گی اور تحریک انصاف بھی خبردار رہے ان کے ممبران بھی زرداری کی سودے بازی کے نشانہ پر ہیں ،زرداری کی کرپٹ سوچ نے میثاق ِ جمہوریت کی دھجیاں اڑائیں ۔ انہوں نے کہا کہ آصف زرادی نے بھٹوز کی پیپلز پارٹی کو بھائو تائو کا بازار بنائے رکھا ہے ، زرداری صاحب اپنی ہمشیرہ کو چیئرمین سینٹ بنوا کر نظام پر مسلط رہنا چاہتے ہیں ،سینٹ کنٹرول کرنے کے لئے زرداری ہر جماعت کے ممبران کو خریدنے کی سازش کر رہے ہیں۔ خواجہ سعد رفیق نے کہا کہ آصف زرداری کی بلوچستان کے کٹھ پتلی وزیر اعلی سے ملاقات سینٹ الیکشن میں شرمناک ہارس ٹریڈنگ کا آغاز ہے ۔ بلوچستان میں تبدیلی درحقیقت جمہوریت کے غلاف میں لپٹی خرید وفروخت ہے ،زرداری نے بلوچستان سے سینٹ نشستیں لینے کے لئے جمہوریت کش سوچ کا ساتھ دیا۔
