ا سلام آباد (این این آئی)پاکستان تحریک انصاف کے رہنما اعجاز چوہدری نے کہا ہے کہ قومی احتساب بیورو (نیب) کی کارکردگی پر ان کی جماعت کو اب ذرا بھی شک نہیں ہے کیونکہ یہ ادارہ اس وقت درست سمت میں کام کررہا ہے۔ایک انٹرویومیں اعجاز چوہدری نے کہا کہ وزیراعلیٰ پنجاب شبہاز شریف نے جس طرح نیب میں پیش ہونے کے بعد پریس کانفرنس میں اس کو تنقید کا نشانہ بنایا وہ بالکل نامناسب ہے اور بظاہر لگتا ہے انہیں اپنی کرپشن کے حوالے سے خوف محسوس ہورہا ہے۔

انہوں نے کہا کہ میں سمجھتا ہوں کہ مسلم لیگ (ن) کی اپنے دور میں صرف یہی پالیسی رہی ہے کہ کسی طرح سے اداروں کو بدنام کیا جائے اور اسی لیے جو فیصلہ بھی ان کے خلاف آجائے یہ اشاروں میں سازش کی باتیں شروع کردیتے ہیں۔شہاز شریف کی جانب سے نیب کو پاکستان پیپلز پارٹی (پی پی پی) اور تحریک انصاف کا کاسہ لیس کہنے پر ان کا کہنا تھا کہ ان کی جماعت نے ہمیشہ عدالتوں کا سامنا کیا ہے، لہذا ان کی جماعت عدلیہ اور ریاستی اداروں کا ہر طرح سے احترام کرنا جانتی ہے۔پی ٹی آئی رہنما نے کہا کہ مسلم لیگ (ن) کی یہی حکمت عملی رہی ہے کہ حکومت میں رہتے ہوئے اداروں کے سربراہاں کا تقرر بھی ان کی خواہش سے ہو تاکہ جب کوئی مخالفت میں فیصلے دے یا ان کا احتساب کرے تو وہ بْرا کہلاتا ہے۔ان کا کہنا تھا کہ گذشتہ 9 سالوں میں جتنی کرپشن پنجاب میں ہوئی، وہ کہیں اور نہیں ہوئی اور اسی لیے آج جب نیب ان سے سوال کررہا ہے تو ان کی چیخیں نکل رہی ہیں۔چیئرمین عمران خان کی جانب سے لاہور میں متحدہ اپوزیشن کے جلسے میں پارلیمنٹ کیلئے لعنت کا لفظ استعمال کیے جانے پر بات کرتے ہوئے اعجاز چوہدری نے کہا کہ ان کا مؤقف ابھی بھی وہی ہے اور جو عمران خان نے کہا وہ بلکل درست بات ہے۔انہوں نے کہا کہ ہم اس بیان پر کبھی معذرت نہیں کریں گے کیونکہ جس پارلیمنٹ نے ایک نااہل شخص کو پارٹی کا سربراہ بنایا اور جہاں پھر ختم نبوت کے حلف نامے میں تبدیلی کی گئی اس کیلئے یہ لفظ بالکل ٹھیک تھا۔