لاہور(اے این این)پاکستان عوامی تحریک کے سربراہ ڈاکٹر طاہر القادری نے پیش گوئی کی ہے کہ شہباز حکومت دو ماہ سے بھی پہلے اپنے انجام کو پہنچ جائیگی ،پیپلز پارٹی اور تحریک انصاف کے ایک دوسرے سے گلے شکوے دور کرانے کی کوششیں جاری رکھوں گا۔لاہورمیں صحافیوں سے غیر رسمی گفتگو کرتے ہوئے ڈاکٹر طاہر القادری نے کہا کہ احتیاطاً دو ماہ کی بات ہے سانحہ ماڈل ٹاؤن کے ذمہ داروں سے بہت پہلے نجات مل جائے گی۔
انہوں نے کہا کہ پیپلز پارٹی اور تحریک انصاف اپنے اپنے موقف پر درست ہیں ں دونوں جماعتیں شہدا ء کے قصاص کے لیے ہمارے ساتھ کھڑی ہیں۔انہوں نے کہا کہ ایم کیو ایم پاکستان رابطے میں ہے اگلے فیز میں ساتھ کھڑی ہو گی۔ مال روڈ جلسہ ہماری حکمت عملی کے عین مطابق اور کامیاب جلسہ تھا۔ مختلف نظریات رکھنے والی جماعتوں کو ایک ساتھ لیکر چلنا آسان کام نہیں۔ اپنے اپنے موقف کے ساتھ تمام جماعتیں سانحہ ماڈل ٹاؤن کے شہدا کے انصاف کے لیے یک آواز ہیں۔ ڈاکٹر طاہر القادری نے کہا کہ سینیٹ انتخابات کے حوالے کبھی اجلاسوں میں ایک بات تک نہیں ہوئی۔
