اسلام آباد(این این آئی)رکن قومی اسمبلی مراد سعید نے کہاہے کہ چوروں، ڈاکوؤں، نااہل شخص کیلئے قانون بنانے، ختم نبوت میں ترمیم کرنے اور عوامی مفاد میں قانون نہ بنانے والی پارلیمنٹ پر ایک نہیں سو مرتبہ لعنت بھیجتا ہوں۔یہ بات انہوں نے پارلیمنٹ کے باہر میڈیا سے گفتگو کرتے ہوئے کہی۔ شہریار آفریدی و دیگر ممبران بھی ان کے ہمراہ تھے۔ انہوں نے کہا کہ اسلام میں چور کی سزا ہاتھ کاٹنا ہے اور

پارلیمنٹ نے چور کو لیڈر بنا دیا ہے۔ نون لیگ نے پارلیمنٹ کا وقار مجروح کیا ہے۔تحریک انصاف پارلیمنٹ کی عزت بڑھائے گی۔ گذشتہ روز ایوان کے اندر بیٹھے لوگوں نے اپنی اصلاح کرنے اور اپنے کرتوتوں کو ٹھیک کرنے پر غور کرنے کے بجائے عمران خان کے خلاف تقریریں کیں۔مراد سعید نے مزید کہا کہ سپیکر نے مجھے کہا تھا کہ سوالات کے بعد آپ کو بولنے کا موقع دیا جائے گا، مگر اس کے باوجود بولنے کا موقع نہیں دیا گیا، کیونکہ سچ سننے کے لئے ہمت کی ضرورت ہوتی ہے۔ جن ارکان اسمبلی کو کل غیرت آئی تھی ان کی غیرت اس وقت کہاں تھی جب ختم نبوت میں ترمیم کی گئی تھی۔ اس وقت ان کی غیرت کہاں تھی جب ایک نااہل وزیراعظم کے لئے قانون بنایا گیا۔ شیخ مجیب الرحمان کا ذکر کر کے ایک نااہل وزیراعظم نے پاکستان کو تقسیم کرنے کی بات کی ہے۔ انہوں نے مزید کہا کہ ایک نااہل کی تصویر کو پارلیمنٹ میں لایا گیا۔ ایوان سے جھوٹ بولا گیا۔ مزدوروں کے بجائے اپنی تنخواہوں میں اضافہ کیا گیا۔ کیا اس وقت ایوان کا وقار مجروح نہیں ہوا۔انہوں نے کہا کہ میں ایسی پارلیمنٹ جس میں ختم نبوت کے آئین میں ترمیم کی جائے، نااہل شخص کے لئے قانون بنایا جائے، غریب کے لئے قانون سازی نہ کی جائے اور اپنی تنخواہوں میں اضافہ کیا جائے پر ایک نہیں سو مرتبہ لعنت بھیجتا ہوں۔ انہوں نے کہا کہ عوامی مفاد کے قانون کو پاس نہیں ہونے دیا جاتا ہے۔ بدقسمتی سے وزیراعظم شاہد خاقان عباسی ایک نااہل وزیراعظم کی تصویر میز پر رکھ کر کہتے ہیں کہ یہ میرا وزیراعظم ہے۔