بنکاک(مانیٹرنگ ڈیسک) پاکستانی سفارتخانے کا ایک اہلکار غیر ملکیوں کوپاکستانی پاسپورٹ جاری کرنے میں ملوث ہے، یہ انکشاف اسسٹنٹ ڈائریکٹر پاسپورٹ اینڈ امیگریشن ایاز الدین نے اپنی ایک درخواست میں کیا ہے، تفصیلات کے مطابق اسسٹنٹ ڈائریکٹر پاسپورٹ اینڈ امیگریشن ایاز الدین کی طرف سے ڈائریکٹر جنرل پاسپورٹ ایف آئی اے کو بھیجی جانے والی ایک درخواست میں انکشاف کیا گیا ہے کہ کچھ عرصہ قبل ایک برمی باشندے کو پاکستانی پاسپورٹ جاری کیا گیا جسے کراچی ائیر پورٹ پر گرفتار کر لیا گیا تھا،

انہوں نے اپنی درخواست میں موقف اختیار کیا کہ اس کے علاوہ بھی بہت سے غیر ملکیوں کو پاکستانی پاسپورٹ جاری کیے گئے ہیں، اسسٹنٹ ڈائریکٹر پاسپورٹ اینڈ امیگریشن ایاز الدین نے مزید بتایا کہ جب میں نے اس غیر قانونی حرکت پر اعتراض کیا تو مجھے دھمکیاں دی گئیں اور مجھے واپس پاکستان بھجوا دیا گیا، انہوں نے اپنی درخواست میں موقف اختیار کیا کہ پاکستانی سفارتخانے میں اس گروہ کی جونیئر قونصلر فراز زیدی پشت پناہی کر رہے ہیں جو جونیئر قونصلر ہونے کے باوجود سینئر پوسٹ آف چیف آف مشن کی پوسٹ پر کام کر رہا ہے۔