لاہور ( این این آئی) متحدہ اپوزیشن کے مال روڈ پر منعقدہ جلسے میں ڈیوٹی پر تعینات پولیس اہلکار چل بسا ۔ بتایا گیا ہے کہ پرانی انار کلی کے پولیس اہلکار مظہر اقبال کو بیماری کے باوجود مال روڈ پر ہونے والے جلسے میں ڈیوٹی پر تعینات کیا گیا تھا ،دوران ڈیوٹی اہلکار کی طبیعت ناساز ہوئی جس پر اسے ہسپتال منتقل کیا گیا مگر وہ جانبر نہ ہو سکا ۔ دریں اثناء پاکستان پیپلز پارٹی پارلیمنٹرینز کے سربراہ و سابق صدر مملکت آصف علی زرداری کا مال روڈ پر منعقدہ متحدہ اپوزیشن کے جلسے میں پہنچنے پر
پاکستان عوامی تحریک کے سربراہ ڈاکٹر طاہر القادری اور پیپلز پارٹی کے رہنماؤں نے خود جا کر استقبال کیا۔ اسٹیج پر پہنچنے کے بعد آصف زرداری ، ڈاکٹر طاہر القادری ، راجہ پرویز اشرف ، قمر زمان کائرہ سمیت دیگر نے ہاتھوں میں ہاتھ ڈال کر یکجہتی کا اظہار کیا۔ اس موقع پر پیپلزپارٹی کے رہنما شوکت بسرا نے ’’ شیروں کا شکاری ۔۔آصف زرداری آصف زرداری ‘‘ کے نعرے لگوائے جس کے جواب میں کارکنوں کی طرف سے اگلی واری فیر زرداری کے نعرے لگائے گئے ۔
