اسلام آباد (آئی این پی)تحریک انصاف نے ختم نبوت کے حوالے سے حلف نامے میں تبدیلی کی آزادانہ اور مکمل تحقیقات کا مطالبہ کردیا ۔منگل کو پاکستان تحریک انصاف کی مرکزی قیادت کا اہم اجلاس ہوا۔چیئرمین عمران خان نے اجلاس کی صدارت کی ۔اجلاس میں ختم نبوتؐ کے معاملے پر پیداہونے والی صورتحال کا خصوصی جائزہ لیا گیا۔تحریک انصاف کا کہنا تھاکہ نواز شریف کی مرضی اور
منشاء کے بغیر حساس ترین قانون میں ترمیم ممکن نہیں،آغاز سے اختتام تک معاملے میں گہری سازش کے آثار دکھائی دیتے ہیں،حقائق قوم کے سامنے لانے کیلئے معاملیکی آزادانہ تحقیقات ناگزیر ہیں۔تحریک انصاف کا کہنا تھاکہ پورے معاملے میں حکومت نام کی چیز قوم کو نظر نہیں آئی،پاکستان کو افراتفری اور سنگین داخلی بحران سے بچانے کیلئے عسکری قیادت کا کردار قابل ستائش ہے۔اجلاس میں حدیبیہ پیپر ملز کیس پر کارروائی کے مختلف پہلوؤں پر مفصل تبادلہ خیال کیا گیا۔اجلاس میں دی جانے والی بریفنگ کی روشنی میں چیئرمین تحریک انصاف کی حیبیہ کیس کی خصوصی مانیٹرنگ کی ہدایت کی۔نیب کی کارکردگی پر عدم اطمینان اور گہری تشویش کا اظہار کیا گیا۔چیئرمین نیب سے فوری مداخلت اور پراسکیوشن برانچ کی کارگردگی کے جائزے کا مطالبہ کیا گیا۔تحریک انصاف کا کہنا تھاکہ قومی مفاد کے مقدمے پر عام معاملے کیطرح کارروائی سے گریز لازم ہے۔اجلاس میں قبل ازانتخابات کے مطالبے کا بھی اعادہ کیا گیا او رکہاگیاکہ ملک میں حکومت نام کی چیزکا وجود تک نظر نہیں آتا،بحران سے نکالنے کیلئے فوری انتخابات کے انعقاد کی راہ ہموار کی جائے۔
