اسلام آباد (آئی این پی )وفاقی وزیر ریلوے خواجہ سعد رفیق نے کہا ہے کہ پرویزمشرف کو متبادل لیڈر کے طور پر سامنے لانے کی کوششیں بری طرح ناکام ہوں گی، سیاسی جماعتیں بنانے اور توڑنے کامشغلہ ترک کرنا ہوگا،قومی سیاست کا فیصلہ ایوانوں میں نہیں گلیوں،بازاروں میں ہی ہوگا،مسلم لیگی قیادت کوجکڑنے،بدنام کرنے کے منصوبے ناکام رہیں گے،

محاذ آرائی ہوئی توکسی کے ہاتھ کچھ نہیں آئیگا، ناانصافی اوربدگمانی قوم کو منزل سے دورکردے گی۔ ہفتہ کو سماجی رابطوں کی ویب سائیٹ ٹوئٹر پر اے پی ایم ایل اور دیگر جماعتوں کے نئے سیاسی اتحاد کے قیام پر اپنے ردعمل کا اظہار کرتے ہوئے مسلم لیگ (ن) کے رہنما سعد رفیق نے کہا کہ سیاسی جماعتیں بنانیاور توڑنے کامشغلہ ترک کرنا ہوگا،قومی سیاست کا فیصلہ ایوانوں میں نہیں گلیوں،بازاروں میں ہی ہوگا۔انہوں نے کہا کہ ایم کیوایم اورپی ایس پی کاانجنیئرڈ ملاپ 24 گھنٹے میں ناکام ہوا۔سعد رفیق کا کہنا تھا کہ مقدمات کے ذریعے مسلم لیگی قیادت کوجکڑنے،بدنام کرنے کے منصوبے ناکام رہیں گے،عدالتی فیصلوں کے نتیجے میں ختم شدہ حدیبیہ پیپرمل کیس کا دوبارہ اجرا ناانصافی ہے۔وزیر ریلوے نے کہا کہ محاذ آرائی ہوئی توکسی کے ہاتھ کچھ نہیں آئیگا، تکلیف کے باوجود تحمل سے کام لے رہے ہیں، ناانصافی،زیادتی اورغیرقانونی اقدامات سے گریزکیاجائے۔انہوں نے مزید کہا کہ ناانصافی اوربدگمانی قوم کو منزل سے دورکردے گی،نئے عوامی فیصلے کا انتظارکیاجائے۔