فیصل آباد (مانیٹرنگ ڈیسک) وزیر مملکت عابد شیر علی کی فون پر تبادلے کا حکم دیتے ہوئے وڈیو لیک ہو گئی۔ تفصیلات کے مطابق عابد شیر علی کی ایک وڈیو لیک ہوئی ہے جس میں وہ کسی بندے کو فون کر کے ایک چہیتے شخص کا تبادلہ واپس پرانی جگہ کرنے کا کہہ رہے ہیں۔
اداروں میں سیاسی مداخلت ان کی تباہی میں اہم کردار ادا کرتی ہے لیکن پاکستان میں سیاستدانوں کی طرف سے یہ کام پورے جوش و خروش کے ساتھ کیا جاتا ہے جس کی واضح مثال وزیر مملکت عابد شیر علی کی سوشل میڈیا پر منظر عام پر آنے والی ویڈیو ہے۔ ویڈیو میں دیکھا جاسکتا ہے کہ عابد شیر علی اپنے ساتھیوں کے جھرمٹ میں بیٹھے ہیں اور موبائل فون کان کے ساتھ لگایا ہوا ہے۔ عابد شیر علی مخاطب کو اسد کے نام سے پکارتے ہیں اور اسے بتاتے ہیں کہ گل فرید ولد اشرف خان کا تبادلہ کردیا گیا ہے، ’ گل فرید میرا بڑا پیارا ہے، میرے حلقے کا لڑکا ہے اس کا تبادلہ کردیا گیا ہے‘۔ عابد شیر علی اپنے مخاطب کو حکم دیتے ہیں کہ گل فرید کو اس کی سابقہ ڈیوٹی پر بحال رکھا جائے، جس کے بعد آگے سے اثبات میں جواب ملنے پر کال منقطع کردیتے ہیں۔واضح رہے کہ اس سے قبل بھی حکمناموں پر مشتمل چند ’’پرچیاں‘‘ عابد شیر علی کی منظر عام پر آ چکی ہیں۔
