اسلام آباد (مانیٹرنگ ڈیسک) اسلام آباد کے طویل المنزلہ مال سینٹورس میں اسلامی نوادرات کی نمائش کے موقع پر تبرکات دیکھ کرحریت رہنما یاسین ملک کی اہلیہ مشعال ملک جذباتی ہو گئیں، باب کعبہ کو چوم کر روتی رہیں۔ تفصیلات کے مطابق سعودی سفارتخانے اور سیٹنورس انتظامیہ کے اشتراک سے سینٹورس مال میں اسلامی نوادرات جن میں خصوصاََ غلاف اور باب کعبہ شامل ہیں کی 10روز نمائش کے موقع پر اس وقت حریت رہنما یاسین ملک کی اہلیہ مشعال ملک انتہائی جذبات ہو گئیں جب وہ باب کعبہ کی زیارت کر رہی تھیں۔
اس موقع پر ان پر رقت طاری ہو گئی اور وہ جذبات پر قابو نہ رکھ سکیں اور بے ساختہ ’’باب کعبہ ‘‘ سے لپٹ گئیں اور ان کی آنکھوں سے آنسو رواں ہو گئے۔ مشعال ملک جب سینٹورس مال پہنچیں تو ان کا استقبال سعودی سفارت کار ڈاکٹر عبد اللہ الادریسی اور سینٹورس انتظامیہ نےکیا۔ اس موقع پر ڈاکٹر عبد اللہ الادریسی نے کہا کہ مقبوضہ کشمیر میں بھارتی مظالم پر سعودی شہریوں کے دل خون کے آنسو روتے ہیں، مشکل کی ہر گھڑی میں کشمیریوں کے ساتھ کھڑے ہیں، انہوں نے یاسین ملک کی نظر بندی پراظہارتشویش بھی کیا۔
