کراچی: چھرا مار کی گرفتاری کا ٹاسک ایس ایس پی ملیر راؤ انوار کو مل گیا۔تیرہ روز گزر گئے لیکن پولیس سوائے خاکے اور ڈمی تصاویر جاری کرنے کے کچھ نہ کرسکی۔حملہ آور کی گرفتاری پر انعامات کی آفر ہورہی ہیں، لیکن عملی طور پر پولیس، انتظامیہ اور حکومت بے بس نظر آتی ہے۔اب اس چاقو مار کی تلاش میں
ایس ایس پی ملیر رائو انوار بھی لگ گئے ہیں۔دوسری جانب گلستان جوہرمیں خواتین پرچاقو سے حملوں کا ایک اورمقدمہ درج کرلیا گیا ہے۔مقدمہ شارع فیصل تھانے میں زخمی خاتون طاہرہ بانوکے بہنوئی کی مدعیت میں درج کیا گیا ہے۔چاقو سے حملوں کے اب تک 10 مقدمات درج ہو چکے ہیں، جن میں شارع فیصل تھانے میں 7 ، گلستان جوہرتھانے میں 2 اور پی آئی بی تھانے میں ایک مقدمہ درج ہو ا ہے۔دوسری جانب گوجرانوالہ میں بھی چھرا مار گروپ نے خواتین پرحملے شروع کردیے، نامعلوم موٹرسائیکل سواروں نے چاقوسے حملہ کرکے خاتون کوزخمی کردیا۔ میڈیا رپورٹس کے مطابق کراچی کے بعد چھرا مار گروپ پنجاب میں بھی پہنچ گیا ہے۔ گوجرانوالہ کے علاقے ابراہیم کالونی میں جناح روڈ پرچھرامار گروپ سرگرم ہوگیا۔ نامعلوم موٹر سائیکل سوارملزمان نے خاتون پرچاقو سے حملہ کردیا،جس کے نتیجہ میں خاتون شدید زخمی ہوگئی۔زخمی خاتون کوسول ہسپتال منتقل کردیا گیا ہے۔ خاتون کا کہناہے کہ 2 نقاب پوش موٹرسائیکل سواملزمان نے حملہ کرکے زخمی کردیا ہے۔ پولیس نے حملہ آورکیخلاف قانونی کاروائی شروع کردی ہے۔
