اسلام آباد(این این آئی)پاکستان تحریک انصاف کے چیئرمین عمران خان نے (ن) لیگ کی جانب سے سابق وزیر اعظم محمد نواز شریف کو دوبارہ پارٹی صدر بنانے کے فیصلے پرکہا ہے کہ کرپٹ لوگوں کی آؤ بھگت کرنا قیامت کی ایک نشانی ہے ٗخداکی شان،زرداری اوران کی ہمشیرہ مجھ پرہتک عزت کا دعویٰ دائرکرینگے۔سماجی رابطے کی مائیکرو بلاگنگ ویب سائٹ پر ٹوئٹ کرتے ہوئے عمران خان نے کہا کہ یہ مضحکہ خیز ستم ظریفی
ہے کہ آصف زرداری اور ان کی بہن فریال نے میرے خلاف ہتک عزت کا دعویٰ صرف اس لیے دائر کیا کیوں کہ میں نے ان کی بے بہا کرپشن پر بات کی۔انہوں نے کہاکہ خداکی شان،زرداری اوران کی ہمشیرہ مجھ پرہتک عزت کا دعویٰ دائرکرینگے۔ایک اور ٹوئٹ میں سابق وزیراعظم نوازشریف کو شدید تنقید کا نشانہ بناتے ہوئے عمران خان نے کہاکہ پاکستان مسلم لیگ (ن) کی جانب سے نواز شریف کو جماعت کا سربراہ بنانا ایسا ہی ہے جیسے پاگلوں نے پاگل خانے پر قبضہ کر لیا ہو۔عمران خان نے مزید کہا کہ کرپٹ لوگوں کی آؤ بھگت کرنا قیامت کی ایک نشانی ہے۔
