اسلام آباد (مانیٹرنگ ڈیسک)کراچی بڑی تباہی سے بچ گیا، پولیس کی بروقت کارروائی ، 5دہشتگرد ہلاک، فیصل آباد سے تعلق رکھنے والا دہشتگرد ڈرون ٹیکنالوجی کا ماہر نکلا۔ تفصیلات کے مطابق کراچی میں پولیس نے سچ کے علاقے میں کارروائی کرتے ہوئے مقابلے میں 5دہشتگردوں کو ہلاک کر دیا ہے۔ ایس ایس پی رائو انوار کے مطابق پولیس نے خفیہ اطلاع پر سچل کے علاقے میں کارروائی کی۔
پولیس کو دیکھ کر دہشتگردوں نے فائرنگ کر دی جس پر پولیس نے جوابی کارروائی کی جس کے نتیجے میں 5دہشتگرد ہلاک ہو گئے ہیں۔ رائو انوار کے مطابق ہلاک ہونے والے دہشتگردوں کا تعلق دہشتگرد تنظیموں سے تھا جبکہ ہلاک ہونے والے دہشتگردوں میں عامر شریف نامی خطرناک دہشتگرد جو کہ پنجاب کے شہر فیصل آباد سے تعلق رکھتا تھا ایک انجینئر اور ڈرون ٹیکنالوجی کا ماہر تھا۔
