اسلام آباد ( آن لائن)پاکستان تحریک انصاف نے آئندہ انتخابات میں کسی جماعت سے اتحاد نہ کرنے کا اعلان کر دیا۔ ترجمان پی ٹی آئی فواد چوہدری کہتے ہیں سابق وزیراعظم نوا زشریف دوبارہ پاکستان چھوڑنے کی تیاری کر رہے ہیں لیکن ان کوبتانا ہو گا کہ ان کے پاس اتنا پیسا کہاں سے آرہا ہے۔تفصیلات کے مطابق فواد چوہدری کا پریس کانفرنس کرتے ہوئے کہناتھا کہ ہم اسحاق ڈار پر فرد جرم عائد ہونے پر مطمئن ہیں،
ان کے اثاثوں میں 91 فیصد اضافہ ہوا ہے،اسحاق ڈاربتائیں ان کے پاس اتنا پیسا کہاں سے آیا ہے؟ اور میرے خیال میں اب ان کو استعفی دے دینا چاہیے۔ انہوں نے کہاکہ ہم آئندہ انتخابات میں کسی سے اتحاد نہیں کریں گے۔ عمران خان آئندہ انتخابات میں وزیر اعظم ہوں گے جبکہ ملک کے اداروں میں محاذ آرائی کی کیفیت پیدا کی جارہی ہے اور دوسری جانب نوا زشریف دوبارہ پاکستان چھوڑنے کی تیاری کر رہے ہیں مگر شریف خاندان کو بتانا ہوگا کہ ان کے پاس اتنا پیسا کہاں سے آرہا ہے ؟فواد چوہدری کا مزید کہناتھاکہ پی ٹی آئی صرف اپوزیشن جماعتوں کو اکٹھا کر رہی ہے ،ہماری جماعت منظم اور متحد ہے اور ہم آئندہ انتخابات میں کسی سے اتحاد نہیں کریں گے۔یہی نہیں تحریک انصاف کو اپوزیشن میں اس کا جائز مقا م ملنا چاہیے اور ہم اپوزیشن لیڈر کی تبدیلی کیلئے بھی کوشش کررہے ہیں۔ دوسری جانب پاکستان تحریک انصاف کے چیئرمین عمران خان اپنے ہی سینیٹرز نعمان وزیر اور کیتھ ویلیمز پر برس پڑے اور کہا کہ آپ لوگوں کی غیر ذمہ داری کی وجہ سے پارٹی کو شرمندگی ہوئی اور میری اور پارٹی کی ساکھ پر انگلیاں اٹھائی جا رہی ہیں۔بدھ کو تحریک انصاف کے چیئرمین عمران خان سے سینیٹرز نعمان وزیر اور کیتھ ویلیمز نے ملاقات کی۔ اس دوران عمران خان دونوں سینیٹرز پر برس پڑے اور کہا کہ آپ لوگوں کی غیر ذمہ داری کی وجہ سے پارٹی کو شرمندگی ہوئی، میری اور پارٹی کی ساکھ پر انگلیاں اٹھائی جا رہی ہیں، جس پر سینیٹر نعمان وزیر اور کیتھ ویلیمز نے غیر مشروط طور پر معافی مانگ لی۔
