اسلام آباد(مانیٹرنگ ڈیسک)دنیا میں سب سے اونچے مقام پر اے ٹی ایم کا عالمی ریکارڈ پاکستان کے نام ہوگیا۔نیشنل بینک کے مطابق سطح سمندر سے 16ہزار7 فٹ کی بلندی پر اے ٹی ایم مشین کی لگانے کا گینز بک آف ورلڈ ریکارڈپاکستان کے نام ہوگیا ۔گنیز بک آف ورلڈ ریکارڈ میں اس مشین کی شمولیت نیشنل بینک آف پاکستان کی ان کوششوں کا اعتراف ہے، جن کے ذریعے وہ اعلیٰ ترین ٹیکنالوجی، پروڈکٹس اور خدمات کو اپنے کسٹمرز
تک پاکستان کے تمام علاقوں میں پہنچانا چاہتے ہیں اور ان میں پاکستان کے شمالی علاقے، دیہی اور مضافاتی علاقے شامل ہیں۔اس مشین کو اس طرح ڈیزائن کیا گیا ہے کہ یہ منفی 40 ڈگری سینٹی گریڈ میں بھی کام کرسکے۔ قبل ازیں دنیا کی سب سے بلند ترین اے ٹیم مشین بھارت میں چین کی سرحد کے ساتھ کوپاپ کے مقام پر نصب تھی، یہ سطح سمندر سے 14 ہزار 3سو فٹ بلند ہے تاہم پاکستان نے اس سےبھی ایک ہزار فٹ بلندی پر اے ٹی ایم نصب کی ہےجو کہ دنیا بھر میں اپنی نوعیت کا ایک اور منفرد ریکارڈ ہے۔پاکستان کے قومی بینک نے دنیا کی بلند ترین اے ٹی ایم مشین لگا کر بینکنگ کی دنیا میں بھی نیا ریکارڈ بنایا ہے۔گلگت بلتستان کے صوبائی حکومت کے ترجمان کے مطابق گلگت بلتستان میں بلند ترین مقام پر دنیا کی بلند ترین اے ٹی ایم کی تنصیب کی اہمیت اس لیے زیادہ ہے کہ یہ وہ پاس ہے جو پاکستان کو چین سے ملاتا ہے۔انھوں نے کہا کہ ہر سال ہزاروں سیاح اسی ٹاپ کو دیکھنے کے لیے آتے ہیں اور چین جانے والے تاجروں کی بھی یہی گزر گاہ ہے اس لیے یہ اے ٹی ایم ان لوگوں کے لیے نہایت مددگار ثابت ہوگا۔واضح رہے کہ اس سے قبل دنیا کی بلند ترین اے ٹی ایم کا اعزاز بھارت کو حاصل تھا جہاں ریاست سکم میں یو ٹی آئی بینک نے 14300 فٹ کی بلندی پر اے ٹی ایم مشین نصب کی تھی، بھارتی ریاست سکم کی سرحد بھی چین سے ملتی ہے۔یہ دوسرا موقع ہے جب
این بی پی کا نام گینز بک آف ورلڈ میں شامل کیا گیا ،اس سے قبل جولائی 2009ء میں مینگروز کے 532,887 پودے لگانے پر نیشنل بینک آف پاکستان کا نام گنیز بک آف ورلڈ ریکارڈ میں شامل ہوا تھا، یہ پودے کیٹی بندر کے علاقے میں ایک ہی دن میں لگائے گئے تھے۔
