لاہور (مانیٹرنگ ڈیسک) گزشتہ روز پاک افغان سرحد پر ہونے والی فائرنگ کے باعث شہید ہونے والے پاک آرمی کے آفیسر لیفٹیننٹ ارسلان کو خراج عقیدت پیش کرتے ہوئے وزیراعلیٰ پنجاب شہباز شریف نے کہا کہ لیفٹیننٹ ارسلان نے وطن کے دفاع میں جان نثار کر کے ہمیں زندگی کا مطلب بتا دیا۔ وزیراعلیٰ پنجاب نے سوشل میڈیا پر ٹویٹ کے ذریعے پاک فوج کی چیک پوسٹ پر شدت پسندوں کی شیلنگ اور فائرنگ کے نتیجے میں پاک آرمی کے جوانسال لیفٹیننٹ ارسلان کی شہادت پر بیان جاری کیا
کہ لیفٹیننٹ ارسلان نے پاکستان کے دفاع میں اپنی جان قربان کر کے ہمیں ایک عظیم مقصد سے روشناس کرایا ہے، پاک آرمی کے جوان کی شہادت پر مجھے فخر ہے اور دکھ بھی جو میں بیان نہیں کر سکتا ۔ آئی ایس پی آر کے مطابق خیبرایجنسی کے علاقے راجگال میں جس پوسٹ پر شدت پسندوں نے فائرنگ کی وہ کچھ عرصہ قبل ہی بنائی گئی تھی۔ واضح رہے کہ جوانسال پاک آرمی کے لیفٹیننٹ ارسلان شہید تین بہنوں کے اکلوتے بھائی تھے۔
