لاہور(مانیٹرنگ ڈیسک)مسلم لیگ ن کےترجمان سینیٹرڈاکٹر آصف کرمانی نےکہاہےکہ نیب کی طرف سےکوئی نوٹس نہیں ملااورنہ ہی نواز شریف یاان کےصاحبزادے آج نیب میں پیش ہوں گے۔سینیٹرڈاکٹرآصف کرمانی کے مطابق اب تک سمن کی باتیں میڈیا سےہی پتہ چلی ہیں۔نوازشریف اوران کےصاحبزادوں کونیب کاکوئی سمن موصول نہیں ہوا۔گزشتہ شب جاری کیے جانے والے بیان میں سینیٹر آصف کرمانی کا کہنا تھا کہ سمن موصول
ہی نہیں ہواتوپیش کیوں ہوناہے۔جب سمن موصول ہوگاتو پھرپیش ہونےکا سوچاجائےگا۔واضح رہے کہ پاناما لیکس کے معاملہ پر قومی احتساب بیورو (نیب ) نے عزیزیہ اسٹیل مل کے کھاتوں کی تحقیقات کے لیے سابق وزیراعظم نواز شریف اور انکے بیٹوں کو اٹھارہ اگست کو طلب کیا تھا۔ذرائع کے مطابق اس حوالے سے نیب راولپنڈی نے نواز شریف، حسن اور حسین نواز کو طلبی کے نوٹس جاری کرتے ہوئے انہیں 18 اگست یعنی آج صبح 9 بجے نیب لاہور آفس بلایا تھاجبکہ نیب وزیر خزانہ اسحاق ڈار کا معاملہ تئیس اگست کو دیکھے گی۔سپریم کورٹ نے اٹھائیس جولائی کو پاناما کیس کے فیصلے میں نیب کو شریف خاندان، اسحاق ڈار اور کیپٹن صفدر کے خلاف چھ ہفتے میں ریفرنس دائر کرنے کا حکم دیا تھا۔نیب حکام کے مطابق نوازشریف اور ان کے صاحبزادے آج پیش نہیں ہوئے تو انہیں دو ہفتوں دوسرا سمن جاری کیا جائے گا جبکہ تیسرے اور چوتھے سمن آئندہ ماہ جاری کیے جائیں گے۔گزشتہ روزنیب نے سپریم کورٹ سے والیم دس سمیت جے آئی ٹی کی مکمل رپورٹ حاصل کی تھی جبکہ ریفرنسسز کی تیاری کیلئے چارتفتیشی ٹیمیں تشکیل دے دی گئی ہیں۔ وزیرخزانہ کی بہو اور نواز شریف کی صاحبزادی اسماء ڈار کو بھی شامل تفتیش کیا جائے گا ۔ نیب نے سیکیورٹی ایکسچینج کمیشن آف پاکستان سے بھی تفصیلات مانگ لیں۔ ایس ای سی پی حکام کو تئیس اگست کو نیب لاہور آفس میں پیش ہونے کا حکم دیا گیا ہے۔
