اسلام آباد(این این آئی)پاکستان تحریک انصاف نے نوا زشریف کی اداروں کے خلاف نفرت انگیز تقاریر کے معاملے پر چیئرمین پمرا کے خلاف قانونی چارہ جوئی پر غور کرتے ہوئے ان کے نام ایک خط ارسال کردیا ہے۔ یہ خط رکن قومی اسمبلی مراد سعید کی طرف سے لکھا گیا ہے۔ خط کے متن کے مطابق مراد سعید نے ابصار عالم سے اداروں کے خلاف نفرت انگیز مہم نا روکنے پر سات روز کے اندرجواب طلب کر لیا ہے۔
انہوں نے خط میں چیئرمیں سے استفسار کیا ہے کہ نواز شریف نے راولپنڈی میں اپنے پہلے خطاب میں فوج اور عدلیہ کے خلاف نفرت اور اشتعال سے بھرپورخیالات کا اظہا رکیا ۔کمیٹی سے چوک سے داتا دربار چوک تک نواز شریف کی ہر تقریر اداروں کے خلاف زہر افشانی اور نفرت انگیز تھی۔آئین پاکستان اور نیشنل ایکشن پلان کے تحت کسی کو اداروں کی تضحیک کی اجازت نہیں ہے۔ پمرا نے عدالت کی جانب سے تاحیات نااہل قرار دیے گئے شخص کو ریاستی اداروں پر حملہ آور ہونے کی اجازت کیسے دی ۔مراد سعید نے یہ بھی لکھا کہ پمرا نے نواز شریف کی جانب سے ریاست کو عدم استحکام اور داخلی انتشار کا شکار کرنے کی کوششوں کا رستہ کیوں نہیں روکا۔چئیرمین پمرا نے خاموش تماشائی بن کر اداروں کے خلاف مہم جوئی میں نواز شریف کا ساتھ دیا ۔ابصار عالم کو کیوں آئین پاکستان سے انحراف اور سنگین غداری کے جرم میں معاونت کار کے طور پر سزا نہ دی جائے۔ خط کے متن کے مطابق مراد سعید نے ابصار عالم سے اداروں کے خلاف نفرت انگیز مہم نا روکنے پر سات روز کے اندرجواب طلب کر لیا ہے سات روز میں جواب نہ ملا تو ابصار عالم کو منصب سے ہٹانے کیلئے قانونی چارہ جوئی کاحق محفوظ رکھتے ہیں۔
