ٹھٹھہ (این این آئی)ڈسٹرکٹ سیشن جج ٹھٹھہ کی جانب سے ٹھٹھہ کی مدینہ بیکری سے منگوائے جانے والے کیک سے مکھی برآمد ہونے پر سیشن جج نے برہمی کا اظہار کرتے ہوئے بیکری کے مالک کی گرفتاری کا حکم جاری کردیاہے۔ ٹھٹھہ پولیس کے ایس ایچ او بشیر ملاح نے مدینہ بیکری کے مالک کو گرفتار کرنے کے بجائے مدنی بیکری کے مالک اور معزز بیوپاری رشید مدنی کو انتہائی ہتک عزت انداز میں گرفتار کرکے موبائل میں ڈال کر ایس ایس پی ٹھٹھہ فداحسین مستوئی کے دفتر میں پہنچا دیا۔
رشید مدنی کی گرفتاری پر بیوپاری ایسوسی ایشن کے رہنما سراپا احتجاج بن گئے جس کے بعد ایس ایچ او ٹھٹھہ نے گرفتار ہونے والے بیوپاری رشید مدنی سے معذرت کرتے ہوئے انہیں رہا کردیا۔رشید مدنی نے اپنی رہائی کے بعد این این آئی سے بات چیت کرتے ہوِئے کہا کہ ایس ایچ او ٹھٹھہ نے پیشہ ور مجرموں کی طرح مجھے گھسیٹ کر موبائل میں پھینک دیا اور مجھے گرفتار کرکے ایس ایس پی ٹھٹھہ کے دفتر میں پہنچایا جہاں سخت تذلیل کا نشانہ بنایا گیا۔
