پشاور (آئی این پی ) تحریک انصاف کے ڈپٹی پارلیمانی لیڈر اور مرکزی ڈپٹی سیکرٹری اطلاعات شوکت یوسفزئی نے کہا کہ امیرمقام نے خیبرپختونخوا حکومت گرانے کی بات کرکے ہارس ٹریڈنگ کے مرتکب ہونے کا اعلان کیا ہے الیکشن کمیشن فوری نوٹس لے ‘ عائشہ گلالئی لالچی خاتون ہے ڈرامہ کرکے فیملی کوباہر شفٹ کرناچاہتی ہیں ،صوبائی اسمبلی میں ن لیگ بشمول اپوزیشن جماعتوں کے ممبران کی تعداد کم ہے پھر صوبے میں ن لیگ کی حکومت بنانے کی باتیں کیسے کی‘
ممبران کو خریدنے کے علاوہ اور کیا راستہ ہوسکتا ہے صوبے کے عوام نے پی ٹی آئی کو مینڈیٹ دیا ہے اور یہ مینڈیٹ کسی کا باپ بھی نہیں چھین سکتا۔ وہ بروز اتوار پشاور پریس کلب کے باہر عائشہ گلالئی کے خلاف نکالی جانے والی ریلی سے خطاب کر رہے تھے۔ شوکت یوسفزئی نے کہا کہ نواز شریف کو کرپشن پر ہٹایا گیا ہے وفاقی کابینہ انتہائی دباؤ میں بنائی گئی ہے ٹوٹ پھوٹ ابھی سے واضح ہے جن کو وزارتیں نہیں ملیں وہ جلد مسلم لیگ ن کو چھوڑنے والے ہیں شوکت یوسفزئی نے کہا کہ مسلم لیگ ن کی ساری قیادت کرپٹ ہے اور ایک ایک کو سپریم کورٹ سے نااہل کرائیں گے انہوں نے کہا کہ عائشہ گلالئی کو مہرے کے طور پر پی ٹی آئی کے خلاف استعمال کیا جارہا ہے مگر اس طرح کے اوچھے ہتھکنڈوں سے عمران خان اورپارٹی کی مقبولیت کو کم نہیں کیا جاسکتا شہباز شریف شکست کے خوف سے لاہور کے ضمنی الیکشن سے دستبر دار ہوگئے ہیں انہوں نے کہا کہ امیرمقام پر اربوں روپے کی کرپشن کا الزام ہے نیب اور احتساب کمیشن تحقیقات کرے انہوں نے کہا کہ عائشہ گلالئی نے جو کرنا تھا کرلیا وہ لالچی خاتون ہے ان کو عمران خان نے عزت دی مگر چند ٹکوں کے عوض نہ صرف اپنی بلکہ تمام خواتین کی عزت ملیا میٹ کردی انہوں نے کہا کہ گلالئی کی جان کو بھی خطرہ نہیں وہ ڈرامہ کررہی ہیں اور اس طرح پاکستان سے باہر اپنی فیملی کو شفٹ کرناچاہتی ہیں
