اسلام آباد(مانیٹرنگ ڈیسک)عائشہ گلا لئی نے معروف صحافی و تجزیہ کار حامد میر کو مبینہ طور پر عمران خان کی جانب سے بھیجے جانے والے بیہودہ میسجز دکھا دئیے، حامد میر کی تصدیق، پیغام دیکھ کر محسوس کرتا ہوں کہ گلا لئی کے الزامات بے بنیاد نہیں تاہم نتیجہ پر پہنچنے کیلئے معاملے کی تحقیقات ضروری ہیں، معروف صحافی کا ’’جیو نیوز ‘‘کے پروگرام ’’آج شاہزیب خانزادہ کے ساتھ‘‘
میں گفتگو۔ تفصیلات کے مطابق ملک کے نامور اور سینئر صحافی و تجزیہ کار حامد میر نے ’’جیو نیوز‘‘کے پروگرام ’’آج شاہزیب خانزادہ کے ساتھ‘‘میں اس بات کی تصدیق کی ہے کہ عائشہ گلا لئی نے ان کے پروگرام ’’کیپیٹل ٹاک‘‘کے سیٹ پر انہیں مبینہ طور پر عمران خان کی جانب سے بھیجے جانے والے بیہودہ پیغامات دکھائے ہیں، جن میں سے کچھ کو انہوں نے غور سے پڑھا ہے اور ان پیغامات کے جواب میں عائشہ گلا لئی کی جانب سے بھی جوابات موجود تھے۔حامد میر نے ایک سوال کا جواب دیتے ہوئے کہا کہ عائشہ گلا لئی کے الزامات کو ان پیغامات کو دیکھنے کے بعد تقویت ملتی ہے تاہم اس معاملے کی جب تک تحقیقات نہیں کی جا تی تب تک کسی نتیجہ پر نہیں پہنچا جا سکتا۔
