کراچی(این این آئی) کراچی کے ساحلی علاقوں میں گزشتہ چند روز سے پھیلنے والی ناگوار بدبو کی وجہ سامنے آگئی۔
ڈبلیو ڈبلیو ایف پاکستان کے ٹیکنیکل ایڈوائزر معظم خان کے مطابق ساحلی علاقوں میں محسوس ہونے والی بدبو سمندری پودوں فائٹو پلانکٹن کے گلنے سڑنے کے باعث پیدا ہورہی ہے۔انہوں نے بتایا کہ سمندری درجہ حرارت میں تبدیلی کے باعث بڑی تعداد میں فائٹو پلانکٹن مر جاتے ہیں اور سمندری لہروں کے ساتھ ساحل پر پہنچ جاتے ہیں، جہاں ان کے گلنے سڑنے سے ناگوار بدبو پیدا ہوتی ہے۔معظم خان کے مطابق مون سون کے اختتام اور ہواؤں کی رفتار میں کمی کے باعث سمندری نباتات کے نظام میں تبدیلی آتی ہے، جس سے فائٹو پلانکٹن کے ساحل پر جمع ہونے کا عمل بڑھ سکتا ہے۔واضح رہے کہ کراچی کے مختلف علاقوں، خصوصاً ساحلی پٹی میں گزشتہ چند روز سے شہریوں کو ناگوار بو کا سامنا ہے۔
