اسلام آباد(مانیٹرنگ ڈیسک)ممبر قومی اسمبلی جمشید دستی نے آئندہ الیکشن میں نواز شریف کے خلاف میدان میں اترنے کا اعلان کر دیا۔ ٹھوکر نیاز بیگ سے منصورہ تک عوامی رکشہ یونین اور عوامی پاسبان کی آزاد عدلیہ، جے آئی ٹی اور قومی اداروں سے اظہار یکجہتی کیلئے نکالی گئی ریلی سے خطاب کرتے ہوئے جمشید دستی نے کہا کہ میں غریب آدمی ہوں اور غریب عوام میرے ساتھ ہے ۔
آئندہ انتخابات میں ہم جیتیں گے ۔ انہوں نے کہا کہ حکومت میں شامل خوشامدی ٹولے نے مجھے مارنے کی بھرپور کوشش کی لیکن میرے اللہ نے مجھے بچا لیا۔ میری ماں، بہن اور غریبوں کی دعائیں رنگ لائیں اور مجھے تخت لاہور سے آزادی نصیب ہوئی۔ انہوں نے کہا کہ آج میں نے آزاد عدلیہ، جے آئی ٹی ، پاک فوج اور دیگر قومی اداروں کے حق میں نکالی گئی ریلی میں بھی اسی لئے شرکت کی ہے۔
