اسلام آباد (مانیٹرنگ ڈیسک)عدلیہ پر الزامات توہین آمیز اور ناقابل قبول، شہباز شریف معافی مانگیں،وزیراعلیٰ پنجاب کے بیان کے بعد آصف زرداری بھی خم ٹھونک کر سامنے آگئے۔ تفصیلات کے مطابق وزیراعلیٰ شہبا ز شریف کی جانب سے سپریم کورٹ پر جانبداری اور امتیازی سلوک روا رکھنے کے بیان کے بعد پیپلزپارٹی کے چیئرمین آصف علی زرداری بھی خم ٹھونک کر سامنے آگئے ہیں
اور انہوں نے شہباز شریف کے اس بیان کی شدید الفاظ میں مذمت کرتے ہوئے اسے عدلیہ اور سپریم کورٹ پر حملہ قرار دیا ہے۔ اپنے بیان میں آصف زرداری کا کہنا تھا کہ شہباز شریف اپنے توہین آمیز اور ناقابل قبول بیان پر معافی مانگیں۔ ان کا کہنا تھا کہ جے آئی ٹی کے سامنے حسین نواز کی تصویر کو شہباز شریف سپریم کورٹ کی جانب سے شریف خاندان پر حملہ تصور کرتے ہیں۔ جو لوگ یہ کہتے ہیں کہ اس بچے کو وہاں بٹھا کر رکھا گیا وہ ذرا یاد کریں کہ اس طرح دو مرتبہ منتخب وزیراعظم شہید محترمہ بینظیر بھٹو کو جیل کے باہر اینٹوں پر بیٹھنے پر مجبور کیا گیا جبکہ ان کے بچے بھی ان کے بازوئوں میں تھے۔اس وقت تو پیپلزپارٹی نے یہ نہیں کہا کہ سپریم کورٹ نے بندوقیں پیپلزپارٹی کی جانب تان لی ہیں۔ یہاں تک کہ جب شہید ذوالفقار علی بھٹو کو عدالتی قتل کا نشانہ بنایا گیا اس وقت بھی پارٹی نے کبھی بھی سپریم کورٹ پر یہ الزام نہیں لگایا کہ اس نے اپنی بندوق پیپلز پارٹی پر تان لی ہے۔سابق صدر کا کہنا تھا کہ پاکستان پیپلزپارٹی سب کے احتساب پر یقین رکھتی ہے اور وہ اس بات کی اجازت نہیں دے گی کہ قانونی تحقیقات اور عدالتی طریقہ کار پر احتساب سے بچنے کے لئے الزامات لگائے جائیں۔ آصف زرداری نے وکلا اور صحافیوں کی تنظیموں سے اپیل کرتے ہوئے کہا کہ وہ وزیراعلیٰ پنجاب کے دھمکی آمیزاور توہین آمیز بیان کا نوٹس لیں۔
