اسلام آباد / کراچی /لاہور(آئی این پی )موسم کا حال بتانے والے کہتے ہیں کہ پیر سے ملک کے بیشتر علاقوں میں بارشوں کا سلسلہ شروع ہو گا جس سے گرمی کی شدت میں کمی واقع ہو گی۔ ملک کے بیشتر علاقوں میں سورج کے تیور بگڑ گئے ،پنجاب اور سندھ کے میدانی علاقوں میں سورج آگ برسانے لگا ، گرمی نے لاہوریوں کے پسینے نکال دیئے، پارہ 45 کی حد عبور کر گیا، روزے دار بلبلا اٹھے ۔

ملک کے بیشتر میدانی علاقوں میں گرمی کی لہر برقرار اکثر میدانی علاقوں میں سورج آگ برسا نے لگا گرمی نے لوگوں کی چیخیں نکلوا دیں۔ ۔ باغوں کے شہر میں بھی پارہ 45 ڈگری تک جا پہنچا۔سندھ کے میدانی علاقے بھی شدید گرمی کی لپیٹ ہیں۔ دادو میں پارہ 49، سکھر میں 46، حیدر آباد، لاڑکانہ اور جیکب آباد 45 ڈگری پر جا پہنچا اور لوگوں کے ہوش ٹھکانے آ گئے۔محکمہ موسمیات کے مطابق آئندہ 24 گھنٹوں کے دوران پنجا ب اور خیبرپختونخوا کے میدانی علاقوں سمیت بالائی سندھ میں موسم شدید گرم، جبکہ ملک کے دیگر علاقوں میں موسم گرم اور خشک رہے گا۔ ملک کے بیشترمیدانی علاقوں خصوصا بہاولپو، رملتان، ڈی جی خان، ساہیوال، گوجرانوالہ، لاہور، سرگودھا، فیصل آباد، راولپنڈی، پشاور، ڈی آئی خان، بنوں، سبی، سکھر اور لاڑکانہ ڈویژن میں موسم شدید گرم رہے گا۔گزشتہ روز سب سے زیادہ گرمی سبی میں پڑی جہاں درجہ حرارت 50 ڈگری سینٹی گریڈ ریکارڈ کیا گیا۔ دادو، نورپورتھل، بھکر، لاڑکانہ، موہنجوداڑو میں 49، جبکہ جیکب آباد، بینظیر آباد، رحیم یار خان اور ڈی جی خان میں 48 ڈگری سینٹی گریڈ ریکارڈ کیا گیا۔