کراچی (مانیٹرنگ ڈیسک) کراچی میں ڈرون سے دہشت گردی کا منصوبہ ناکام بنا دیا گیا۔ سی ٹی ڈی حکام کے مطابق منصوبہ بندی کرنے والے داعش کے رابطہ کار گروپ کو پکڑ لیا۔ ملزموں میں لاہور کی یونیورسٹی کا پروفیسر، اس کی بھانجی اور دیگر افراد شامل ہیں۔ ذرائع کے مطابق ان دہشت گردوں نے چھوٹے ڈرونز کے ذریعے ٹارگٹڈ بم حملوں کا منصوبہ بنا رکھا تھا۔ ان افراد کے داعش ارکان سے بھی رابطوں کا پتہ چلا ہے۔
گرفتار پروفیسر کا نام ظاہر نہیں کیا گیا۔ دوسری طرف لیاری کے علاقے شاہ بیگ لین میں دو طرفہ فائرنگ کے نتیجے میں ایک شخص ہلاک اور ایک زخمی ہوگیا۔ ہلاک ہونے والے شخص کی شناخت گینگ وار میں ملوث ملزم بابا گولڈن کے نام سے ہوئی۔ معلوم ہوا ہے کہ بابا گولڈن، تاج محمد نامی شخص پر حملہ کرنے آیا تھا اور اس کی فائرنگ سے تاج محمد زخمی ہوا جب کہ تاج محمد کی جوابی فائرنگ سے بابا گولڈن مارا گیا۔ مقتول قتل اور اقدام قتل سمیت سنگین جرائم میں ملوث تھا۔ اس کے علاوہ ٹاور کے علاقے میںپیرکی شب فائرنگ کے واقعے میں ایک شخص ہلاک ہوگیا ۔ دریں اثنا اتوار کو رات گئے فائرنگ سے زخمی 65 سالہ ماما امید علی ولد علی محمد بلوچ سول ہسپتال میں زخموں کی تاب نہ لاتے ہوئے دم توڑ گیا۔ ماما امید علی پیپلزپارٹی کا سابق کونسلر، لیاری بزرگ کمیٹی کا رہنما اور گینگ وار کے اہم کردار غفار ذکری کا ماموں تھا۔ پولیس ذرائع کے مطابق امید علی کا بابا لاڈلا کے بھائی زار لاڈلا سے رقم کے لین دین پر تنازعہ چل رہا تھا اور مبینہ طور پر اسے بابا لاڈلا گروپ کے کمانڈر شوکت نے فائرنگ کرکے ہلاک کیا ہے۔پولیس ذرائع کے مطابق امید علی کا بابا لاڈلا کے بھائی زار لاڈلا سے رقم کے لین دین پر تنازعہ چل رہا تھا اور مبینہ طور پر اسے بابا لاڈلا گروپ کے کمانڈر شوکت نے فائرنگ کرکے ہلاک کیا ہے۔
