اسلام آباد (مانیٹرنگ ڈیسک) سابق گورنر سندھ ڈاکٹر عشرت العباد اور مہاجر قومی موومنٹ کے رہنما آفاق احمد کے درمیان ٹیلی فونک رابطہ ۔ گلے شکوے اور غلط فہمیاں دور کرنے پر اتفاق ۔ تفصیلات کے مطابق طویل عرصے کے بعدایم کیو ایم پاکستان سے بظاہر منسلک سابق گورنر سندھ ڈاکٹر عشرت العباد اور مہاجر قومی موومنٹ کے رہنما آفاق احمد کے درمیان ٹیلی فونک رابطہ ہوا ہے۔

دنیا نیوز کے مطابق رابطے میں عشرت العباد خان نے پرانی رنجشیں، گلے شکوے اور غلط فہمیاں دور کرنے کی کوشش کی جبکہ دونوں رہنماؤں کے درمیان موجودہ سیاسی صورتحال پر بھی گفتگو ہوئی۔گزشتہ روز مہاجر قومی موومنٹ کے رہنما کی جانب سے نشتر پارک میں بڑے جلسے کا اعلان کیا گیا تھا۔واضح رہے کہ سابق گورنر سندھ ڈاکٹر عشرت العباد خان سے متعلق دعویٰ کیا جاتا ہے کہ وہ بظاہر ایم کیو ایم پاکستان کے ساتھ ہیں جبکہ متحدہ لندن کے ساتھ بھی رابطے میں رہتے ہیں ۔ دونوں رہنمائوں کے ٹیلفونک رابطے کو کراچی میں متحدہ کے دھڑوں کے عام انتخابات سے قبل انضمام کے حوالے سے اہم پیشرفت قرار دیا جا رہا ہے۔ اس حوالے سے پیپلزپارٹی کے رہنما منظور وسان بھی متعدد مرتبہ پیش گوئی کر چکے ہیں کہ عام انتخابات 2018سے قبل ایم کیو ایم کے تمام دھڑے آپس میں دوبارہ مل جائیں گے۔

موضوعات:ڈاکٹر عشرت العباد عشرت العباد مہاجر قومی موومنٹ