اسلام آباد(آن لائن)پیمرا اتھارٹی کے 126ویں اجلاس میں 29نجی ٹی وی چینلوںپر 23فروری 2017ءکو گلبرگ لاہور میں دھماکہ کی جعلی خبر نشر کرنے پر جرمانہ عائد کرنے کا فیصلہ کیا گیا ہے۔ اجلاس میں فیصلہ کیا گیا ہے کہ جعلی خبر نشر کرنے والے نجی قومی ٹی وی چینلوں پر دس لاکھ روپے فی چینل جبکہ علاقائی چینلوں پر پانچ لاکھ روپے فی چینل جرمانہ عائد کیا جائیگا۔
ان ٹی وی چینلوں کی انتظامیہ کو جرمانہ کی رقم تین ہفتوں میں جمع کروانے کا حکم دیا گیا ہے اس کے علاوہ ان چینلوں کی انتظامیہ کو ہدایت دی گئی ہے کہ وہ6مارچ 2017 ء کو شام 6.00بجے سے شام 7.00بجے تک معمول کی نشریات کے دوران جعلی خبر چلانے پر ناظرین سے معذرت کے ٹکرز چلائیں گے ۔ پیمرا اتھارٹی نے ٹی وی چینلز کو معذرت کی مندرجہ ذیل تحریر بھی فراہم کی ہے۔’’23فروری 2107ء کو ہمارے ٹی وی چینل نے گلبرگ ، لاہور میں بم دھماکہ کی ایک غیر مصدقہ خبر نشر کی جو کہ بعد میں غلط ثابت ہوئی اس پر پیمرا نے ہمیں مبلغ دس لاکھ/پانچ لاکھ روپے جرمانہ کیا اور معافی نشر کرنے کی بھی ہدایت کی۔ پیمرا کے حکم کے مطابق ہمارا ادارہ معذرت خواہ ہے کہ ہماری غلط خبر کی وجہ سے عوام الناس میں خوف و ہراس پھیلا اور ناظرین کو ذہنی اذیت سے دوچار ہونا پڑا۔‘‘جمعہ کے روز ہونے والے پیمرا اتھارٹی کے اجلاس میں جس کی صدارت چیئر مین پیمرا ابصار عالم کر رہے تھے پیمرا کمیٹی کی طرف سے پیش کی گئی سفارشات کی روشنی میں مذکورہ فیصلہ کیا گیا۔ چیئرمین ایف بی آر ڈاکٹر محمد ارشاد ، ممبر پیمرا خیبر پختونخواہ شاہین حبیب اللہ، ممبر پنجاب نرگس ناصر نے بھی اجلاس میں شرکت کی۔جن قومی نیوز اور کرنٹ افیئرز چینلز نے گلبرگ لاہور میں بم دھماکہ کی غیر مصدقہ خبر چلائی
ان میں سماء ٹی وی، ڈان نیوز، چینل ۔5، 7نیوز، دن نیوز، چینل ۔92، ایکسپریس نیوز، سچ ٹی وی، چینل ۔ 24، لاہور نیوز، میٹرو ون، جیو نیوز، دنیا ٹی وی، اے آر وائی نیوز، نیو ٹی وی اور کوہِ نورجبکہ علاقائی ٹی وی چینلوں میں کے ٹی این نیوز، سندھ ٹی وی نیوز، خیبر نیوز، آواز ٹی وی اورمہران ٹی وی شامل ہیں۔ پیمرا اتھارٹی ممبران نے ٹی وی چینلوں کے غیر سنجیدہ اور غیر پیشہ وارانہ رویے پر تشویش کا اظہار کیا اور اس عزم کا اعادہ کیا کہ پیمرا اس طرح کی کسی بھی غیر مصدّقہ اور خلافِ حقائق خبر نشر کرنے پر سخت کاروائی کرے گا۔
اتھارٹی کے ارکان نے وزاتِ اطلاعات و نشریات سے پی ٹی وی نیوز کی طرف سے مذکورہ خبر نشر کئے جانے کا جائزہ لینے کو بھی کہا۔ پیمرا کو پی ٹی وی نیوز کے خلاف بھی گلبرگ بم دھماکے کی غلط خبر نشر کرنے پر شکایات موصول ہوئی تھیں مگر پی ٹی وی پیمرا کے دائرہ اختیار میں نہیں آتا۔یہ بات قابلِ ذکر ہے کہ ایک روز قبل بیشتر ٹی وی چینلوں نے پیمرا کمیٹی کے روبروپیش ہو کر اعتراف کیا تھا کہ انہوں نے مذکورہ خبر بغیر تصدیق کے چلائی تھی۔