اسلام آباد(مانیٹرنگ ڈیسک)”ہمارے راستے سے ہٹ جاؤ ہمیں پنجاب پر حملے کیلئے جانے دو “اے این پی کے سربراہ اسفند یار ولی نے کالعدم تحریک طالبان پاکستان کے امیر کی طرف سے ملنے والی دھمکی کا انکشاف کر دیا ۔نجی ٹی وی پروگرامیں گفتگو کرتے ہوئے اسفند یار والی نے انکشاف کیا ہے کہ مجھےکالعدم تحریک طالبان پاکستان کے امیر فضل اللہ

نے ٹیلی فون کرکے کہا تھا کہ ’’ہمارے راستے سے ہٹ جاؤ ہمیں پنجاب پر حملے کیلئے جانے دو ‘‘۔ان کا کہنا تھا کہ ہر افغان پختون ہے لیکن ہر پختون افغان نہیں ہے،میں فخر کرتا ہوکہ میں ایک پاکستانی ہوں،میری پاکستانیت پر کسی کو شک نہیں کرنا چاہیے۔پاکستان میں پختونوں کے ساتھ جو ہو رہا ہے اس کا ردعمل بہت برا ہوسکتا ہے۔ہماری جماعت کو ہمیشہ پنجاب سے اچھے دماغ رکھنے والے لوگ ملے ہیں۔ہماری جماعت میں حبیب جالب پنجاب سے تھا،مجھے پنجاب یا پنجابیوں سے کوئی گلہ نہیں ہے۔ان کا مزید کہنا تھا کہ جو بھی اپنی سوچ دوسرے پر مسلط کرنے کی کوشش کرتا ہے وہ دہشتگرد ہے چاہے وہ فوجی ہے یا مولوی ۔انہوں نے حکومت کو فاٹا کی آئینی حیثیت بارے ڈیڈ لائن دیتے ہوئے کہا کہ اگر 12مارچ تک فاٹا کا مسئلہ حل نہ ہوا تو دیگر جماعتوں کیساتھ مل کر اسلام آباد میں دھرنا دینگے۔ انہوں نے بتایا کہ فاٹا کے مسئلے پر تمام جماعتیں ان کی ہمنوا ہیں جن میں جماعت اسلامی بھی شامل ہے ۔ فوجی عدالتوں پر پیپلزپارٹی کی اے پی سی سے متعلق بات کرتے ہوئے ان کا کہنا تھا کہ اے پی سی کے بعد وہ فیصلہ کرینگے کہ آیا فوجی عدالتوں کی حمایت کرنی ہے یا مخالفت۔