راولپنڈی /نوشکی (آئی این پی)پاک فوج کے ترجمان نے کہا ہے کہ نوشکی میں دلدل میں پھنسے باراتیوں کو نکالنے کیلئے امدادی کاروائیاں جاری ہیں۔ہفتہ کو پاک فوج کے شعبہ تعلقات عامہ (آئی ایس پی آر) کے مطابق چاغی کے علاقے ڈھاک میں پھنسے افراد کو نکالنے کیلئے ایف سی کی امدادی کارروائی جاری ہیں۔متاثرین نوشکی سے تہتر کلومیٹر کے فاصلے پر واقع صحرائی علاقے ڈھاک میں پھنسے ہوئے ہیں ۔
انتہائی خراب موسم اور برفباری کے باعث ہیلی کاپٹر کی اڑان ناممکن ہے۔ تیز بارش کیچڑ اور دلدلی صورتحال کے باعث گاڑیوں کا متاثرین تک پہنچنا مشکل ہے۔آئی ایس پی آر کے مطابق ایف سی بلوچستان کی مزید چار پیدل پارٹیاں بمعہ ڈاکٹرز متاثرین تک مختلف راستوں سے پیدل پہنچنے کی کوششیں کررہی ہیں ۔ ڈھاک کے قریب ایف سی اہلکاروں پر مشتمل پہلی پارٹی موقع پر پہنچ چکی ہے ۔کیچڑ اور دلدل میں پھنسے باراتی بچوں اور خواتین کو پہلے مرحلے میں بحفاظت باہر نکال کر محفوظ مقام پر منتقل کیا جارہا ہے۔ موقع پر متاثرین کو خوراک کمبل اور ادویات بھی مہیا کی جارہی ہے۔واضح رہے کہ گزشتہ روز چھ گاڑیوں پر مشتمل باراتی قافلہ جس میں دلہا دلہن سمیت 65افراد شامل تھے چاغی سے نوشکی آتے ہوئے شدید برف باری کے باعث رات گئے زارو کے مقام پر پھنس گئے جس کا فاصلہ نوشکی سے تقریبا 80کلو میٹر ہے۔
