نوشہرہ(آئی این پی ) نوشہرہ کے علاقے ڈاک بے سود میں بچوں کے درمیان ہونے والی لڑائی میں بڑے کود پڑے اور فائرنگ کے نتیجے میں ماں دو بچوں سمیت قتل جب کہ 2 افراد زخمی ہو گئے۔ نوشہرہ میں پبی کے علاقے ڈاک بے سود میں چھوٹے بچوں کے درمیان کرکٹ کھیلتے ہوئے لڑائی ہو گئی جو دیکھتے ہی دیکھتے ہی بڑھ گئی،

صلح صفائی کے لیے آنے والے بڑے بھی معاملے کو ختم کرانے کے بجائے اس میں کود پڑے اور آپس میں گھتم گھتا ہو گئے۔ لڑائی کے دوران ایک گروپ کی جانب سے فائرنگ کی گئی جس سے ماں اور 2 بیٹے موقع پر ہی جاں بحق جبکہ 2 افراد زخمی ہوئے۔ پولیس کا کہنا ہے کہ زخمیوں کو لیڈی ریڈنگ اسپتال پشاور منتقل کر دیا گیا ہے جبکہ فائرنگ میں ملوث ایک ملزم کو گرفتار اور فرار ہونے والے 4 افراد کی تلاش کا کام جاری ہے۔