اسلام آباد(آئی این پی )پاکستان تحریک انصاف کے دوترجمانوں نعیم الحق اور فواد چوہدری میں صلح ہوگئی ، گزشتہ روز عدالت عظمیٰ سے اکٹھے خوشگوار موڈ میں باہر نکلے اور اختلافات کی تردید کر دی ۔ تفصیلات کے مطابق جمعرات کو پاکستان تحریک انصاف کے ترجمانوں نعیم الحق اور فواد چوہدری میں صلح ہوگئی ، دونوں رہنما پانامہ کیس کی سماعت میں وقفے کے دوران عدالت عظمیٰ سے باہر نکلے تو خوشگوار موڈ میں ہاتھ تھامے ہوئے تھے ۔ بعد ازاں میڈیا سے گفتگو میں رہنماپی ٹی آئی نعیم الحق نے کہا کہ میڈیا پر سن کر میری اور فواد چوہدری کی لڑائی ہوئی ہے میرے اور فواد کے بارے میں غلط خبریں دی گئیں ، ہمارے درمیان کوئی اختلافات نہیں ، فواد چوہدری نے بھی اختلافات کی تردید کرتے ہوئے کہا کہ میں نعیم الحق صاحب کی بہت عزت کرتا ہوں ۔ واضح رہے کہ بدھ کے روز دونوں رہنماؤں میں میڈیا ٹاک کرنے کے معاملے پر سپریم کورٹ میں تلخ کلامی ہوئی تھی ۔