کراچی(آئی این پی)نظام مصطفی پارٹی کے سربراہ سابق وفاقی وزیرحاجی محمد حنیف طیب، شبیر احمدقاضی،الحاج محمدرفیع،صاحبزادہ سعیدامینی ایڈوکیٹ،پیرزادہ غلام حسین چشتی نے اپنے مشترکہ بیان میں کہاکہ گورنر سندھ جسٹس(ر)سعیدالزمان صدیقی نے سندھ اسمبلی کاپاس کردہ پروٹیکشن مینارٹی بل اعتراض کے ساتھ واپس کرنے کے فیصلے کوخوش آئندہے اور پوری پاکستانی قوم کی ترجمانی کرتاہے یہ فیصلہ تمام مکاتب فکرکے علماء ومشائخ کی جانب اس بل کے خلاف چلائی گئی تحریک کی کامیابی ہے۔رہنماؤں نے کہاقرآن وسنت اور آئین پاکستان میں اقلیتوں کو مکمل تحفظ حاصل ہے ،مگرقرآن وسنت اور آئین پاکستان کے متصادم کسی بھی بل کی حمایت نہیں کی جاسکتی ۔
انہوں نے کہاکہ اس بل کو اسلامی نظریاتی کونسل پہلے ہی مستردکرچکی ہے مملکت خداداداسلامی جمہوریہ پاکستان میں کوئی قانون قرآن وسنت کی روح کے خلاف نہیں بنایاجاسکتا۔حکومت سندھ اور اسمبلی میں بیٹھے اراکین کوہوش کے ناخن لینے چاہیے درحقیقت یہ بل ملک کی اساس کے خلاف سازش تھی جیسے علماء ومشائخ اور محب وطن پاکستانی عوام کے اتحادنے ناکام بنادیا ہے ۔
ان رہنماؤں نے سابق صدرچیئرمین پیپلزپارٹی آصف علی زرداری سے مطالبہ کیا کہ وہ قومی رہنماؤں سے اس بل کے واپس لینے کے اپنے وعدہ پرفوری عمل درآمد کرائیں اور آئندہ کوئی بھی ایسا بل پیش کرنے سے پہلے اسلامی نظریاتی کونسل اورعلمائے کرام سے مشورہ لیاجائے ۔
