لاہور (این این آئی) وزیر اعظم محمد نواز شریف کے صاحبزادے حسین نواز نے کہا کہ وزیراعظم کی قیادت میں2017ء میں بھی ترقیاتی ایجنڈے کوآگے بڑھایا جائے گا، پانامہ لیکس کیس میں عدالت جو بھی ثبوت طلب کرے گی ہم پیش کریں گے ، میثاق جمہوریت میں جس سیاست پر اتفاق ہوا تھا سب کو اسے آگے بڑھانا ہوگا، امید ہے سابق صدر آصف علی زرداری اور دوسرے بھی اچھی اقدار کی سیاست کریں گے ،احتجاجی سیاست کرنے والوں کے ایجنڈے کو قوم بخوبی سمجھتی ہے ۔
ان خیالات کااظہار انہو ں نے ایڈوکیٹ سپریم کو رٹ راجہ سلمان اکرم کے والد کے انتقال پر اظہار تعزیت اور فاتحہ خوانی کے بعد نجی ٹی وی سے گفتگوکرتے ہوئے کیا ۔ حسین نواز نے کہا کہ کوئی وجہ ہی نہیں کہ ہم پانامہ لیکس کیس میں عدالت کو مطمئن نہ کر یں، عدالت کو جن بھی کا غذات کی ضرورت ہو گی اور جو بھی ثبوت طلب کیے جائیں گے ہم وہ تمام مہیا کریں گے ۔ انہوں نے کہا کہ سیا سی جماعتیں میثاق جمہوریت کی روح کے مطابق سیاست کریں ،میثاق جمہوریت میں جس سیاست پر اتفاق ہوا تھا اسی کو آگے بڑھانا ہوگا۔ انہو ں نے کہا کہ ملک میں اچھی اقدار کی سیاست کے خواہاں ہیں اور سابق صدر آصف علی زرداری سے بھی اچھی اقدار کی توقع رکھتے ہیں۔
انہو ں نے کہا کہ احتجاج کی کال دینے والوں کے بارے میں مجھے کچھ کہنے کی ضرورت نہیں ہے ، قوم دیکھ چکی ہے کہ احتجاجی سیاست کاسرکل کتنی مرتبہ دہرایا جا چکا ہے ، احتجاجی سیاست کے ایجنڈے کو قوم بخوبی سمجھتی ہے۔ قوم دیکھے گی کہ 2017ء کاپاکستان 2016ء سے کہیں مختلف ہوگا، 2017ء میں وزیر اعظم کی قیادت میں ترقیاتی ایجنڈے کوآگے بڑھایا جائے گا اور کوئی وجہ نہیں ہے کہ یہ ملکی ترقی کا ایجنڈا آگے نہ بڑھایا جا سکے ۔ انہو ں نے کہا کہ قوم اندرونی وبیرونی ہر قسم کے چیلنجز سے نمٹنے کی صلاحیت رکھتی ہے،دعا گو ہوں کہ اللہ تعالیٰ ملک کو درپیش چیلنجز سے نبرد آزما ہونے کی توفیق اور ہمت دے ،ملکی ترقی میں ہر شہری کو اپنا کر دار اداکرنا چاہیے ۔

موضوعات:حسین نواز وزیر اعظم محمد نواز شریف