کراچی (این این آئی) وزیراعلیٰ سندھ کے مشیر برائے اطلاعات مولا بخش چانڈیو نے کہا ہے کہ نواز لیگ تنگ نظر جماعت ہے۔ عقل کے اندھوں کی اکثریت مسلم لیگ (ن) میں ہے ۔ پیپلز پارٹی کی تحریک سے نواز لیگ ختم ہوجائے گی۔ وہ ہفتہ کو بلاول ہاؤس کے باہر میڈیا سے بات چیت کررہے تھے۔ انہوں نے کہا کہ سابق صدر آصف علی زرداری کے وطن واپسی آنے پر کارکن بہت خوش ہیں لیکن ان کے آنے سے مخالفین کی صفوں میں کھلبلی مچ گئی ہے۔ انہوں نے کہا کہ آصف علی زرداری اور بلاول بھٹو کی قیادت میں پیپلز پارٹی 2018ء کے الیکشن جیتے گی۔ آصف علی زرداری کے دور حکومت میں مظلوم طبقات کے لئے قانون سازی کی گئی۔ اس قانون سازی سے ان کو فائدہ پہنچا۔ انہوں نے کہا کہ ہماری مفاہمت نواز شریف سے نہیں بلکہ جمہوریت سے تھی لیکن اس کا فائدہ وفاقی حکومت کو ہوا۔ (ن) لیگ عقل کے اندھوں کی جماعت ہے۔

جب ان کے پاس سیاسی باتیں ختم ہوجاتی ہیں تو وہ ذاتی تنقید پر اتر آتے ہیں۔ انہوں نے کہا کہ رینجرز اور سندھ پولیس کی مشترکہ کوششوں سے صوبہ میں امن قائم ہوا ہے۔ رینجرز کی کل کی کارروائی سے اچھے تاثر کو ختم کرنے کی کوشش کی گئی۔ انہوں نے کہا کہ کل کی کارروائی سے انتقام کا تاثر اڑا تھا۔ شام کو وضاحتی بیان آنے سے صورت حال بہتر ہوگئی ہے۔ گرفتار کرنے والے رہائی کی وجہ کا جواب دے سکتے ہیں۔ ڈاکٹر عاصم پر کیسز بنانے والے خود پریشان ہیں۔ آصف علی زرداری کی ڈاکٹر عاصم سے ملاقات ہوگی میں کچھ کہہ نہیں سکتا۔

سیاسی مفاہمت اور اداروں کا آپس میں اعتماد اور ملک اور قوم کے لئے بہتر ہے۔ انہوں نے کہا کہ پیپلز پارٹی کبھی بھی سولو فلائٹ کی حامی نہیں ہے۔ جنہوں نے اکیلی اڑان لی۔ ان کو ہمیشہ ناکامیاں ملی ہیں۔ جمہوریت پسند جماعتیں ہمارے ساتھ مل کر ملک کی بہتری کے لئے سیاست کریں گی۔ آصف علی زرداری کا تجربہ پارٹی چیئرمین بلاول بھٹو زرداری کیلئے بہت فائدہ مند ہوگا۔ انہوں نے کہا کہ وزیراعظم چوہدری نثار سے ڈرتے ہیں۔ وزیراعظم سہم سہم کر چوہدری نثار سے بات کرتے ہیں۔ چوہدری نثار جب بھی بولتے ہیں، وزیراعظم میں ہمت نہیں ہے کہ وہ ان سے وضاحت طلب کریں۔ انہوں نے کہا کہ اگر ہمارے مطالبات نہ مانے گئے تو ہم سڑکوں پر احتجاج کریں گے۔ اب (ن) لوگ کو جانا ہوگا۔

موضوعات:چوہدری نثار مولا بخش چانڈیو وزیراعظم نوازشریف