اسلام آباد (این این آئی) عمران خان نے گرینڈ آپریشن کرتے ہوئے پنجاب میں بلدیاتی انتخابات کے آخری مرحلے میں پارٹی پالیسی کی خلاف ورزی کرنیوالوں کو پارٹی سے فارغ کر دیا ۔جاری بیان کے مطابق میانوالی سے ملک مطیع اللہ ، فیصل آباد سے ممتاز چیمہ، حسن مسعود ملک اور ذیشان لیاقت کو تحریک انصاف سے خارج کر دیا گیا۔اٹک سے احسن کمبڑیال ، سہیل کمبڑیال اور عاطف کی بنیادی رکنیت معطل کرتے ہوئے اظہار وجوہ کے نوٹس جاری کردیئے گئے،اٹک ، ناروال ، فیصل آباد اور میانوالی سے پارٹی پالیسی کی خلاف ورزی کی شکایت پر درجنوں افراد کی بنیادی رکنیت معطل کردی گئی، معطل ہونے والے اراکین کو اظہار وجوہ کے نوٹسز جاری کئے گئے ہیں، فیصل آباد سے باؤ یعقوب ، میاں محمد اقبال ، میاں شفقت محمود، آفتاب بھٹی، ایاز گجر اور مس نصرت شفیق کی بنیادی پارٹی رکنیت معطل کردی گئی ہے، میانوالی سے ببلی خان ، ڈاکٹر صلاح الدین ، سید محمود شاہ ، فاروق درال اور ملک ممتاز ،فیاض شاہ ، خورشید خٹک، غلام محمد خٹک، ظفر خان بلچ اور نادر شہروز اور ماجد کی بنیادی رکنیت معطل کردی گئی ہے۔ناروال سے طارق انیس، وکیل منج اور ارشد منج کی بنیادی رکنیت معطل کرتے ہوئے شوکاز نوٹسز جاری کئے گئے ہیں۔