کراچی (آئی این پی)سابق صدر آصف زرداری کے قریبی ساتھی کے تین دفاتر پر رینجرز نے چھاپے مارکر4افراد کو حراست میں لے لیا۔جمعہ کو نجی ٹی وی کے مطابق کارروائیاں آئی آئی چند نگر روڈ،ہاکی سٹیڈیم اور میٹروپول کے قریب کی گئیں جبکہ چھاپوں کے دوران دفاتر سے اہم ریکارڈ بھی قبضے میں لے لیا گیا،دفاتر آصف زرداری کے قریبی دوست انور مجید کے ہیں۔
جبکہ رینجرز نے گارڈن کے علاقے میں بھی کارروائی کرکے دو ملزمان کو گرفتار کرلیا۔ جمعہ کو ترجمان رینجرز کے مطابق رینجرز نے گارڈن کے علاقے میں کارروائی کرکے دو ملزمان کو گرفتار کرلیا جبکہ ملزمان کی نشاندہی پر اسلحہ کا ذخیرہ بھی برآمد کرلیا گیا۔ اسلحہ ایک خالی پلاٹ میں زیر زمین چھپایا گیا تھا۔
برآمد کئے گئے اسلحہ میں آٹھ ایس ایم جی‘ سات رپیٹرز اور چار رائفل شامل ہیں۔ تین پستول اور 9882 مختلف اقسام کی گولیاں بھی اسلحے میں شامل ہیں۔ ترجمان کے مطابق گرفتار ملزمان کا تعلق ایم کیو ایم کے عسکری ونگ سے ہے۔

موضوعات:رینجرز