لاہور(این این آئی )عالم اسلام کی عظیم دینی درس گاہ دارالعلوم جامعہ نعیمیہ کے طالب علم نے بہت بڑا اعزازاپنے نام کرلیا۔حافظ محمداحمدستارنے 11ماہ کے کم عرصہ میں قرآن کریم حفظ کرلیا۔اساتذہ اورعزیز واقارب کی طرف سے مبارکباد۔تکمیل حفظ القرآن پرجامعہ نعیمیہ میں منعقدہ تقریب آمین سے اظہار خیال کرتے ہوئے معروف دینی اسکالر وناظم اعلی ٰ جامعہ نعیمیہ علامہ ڈاکٹرمحمدراغب حسین نعیمی نے کہاکہ حفظ القرآن ایک بہت بڑی سعادت مندی ہے۔
قرآن کریم کے نورسے اپنے سینے منور کرنے والے معاشرے کے عظیم افراد ہیں۔دنیوی وآخروی کامیابی کے لیے قرآن کریم سے تعلق مضبوط بنایاجائے۔امہ کے زوال کی بنیادی وجہ تعلیمات قرآن سے دوری ہے۔قرآن وسنت کی تعلیمات پرعمل پیراہوکرہی مسلمان دنیاو آخرت میں سرخرو ہوسکتے ہیں۔
جو شخص قرآن مجید کو حفظ کرنے کے بعداس پر عمل کرتا ہے اللہ تعالی اسے اجر عظیم سے نوازتے ہیں۔اور اسے اتنی عزت وشرف سے نوازا جاتا ہے کہ وہ کتاب اللہ کو جتنا پڑھتا ہے اس حساب سے اسے جنت کے درجات ملتے ہیں۔موجودہ دورمیں ضرورت اس امرکی ہے کہ قرآن کریم کی طرف رجوع کیا جائے، ہماری تقدیر اس وقت تک نہیں بدلے گی، اور ہم عزت وسربلندی حاصل نہیں کرسکتے جب تک کہ قرآن کی احکامات پرعمل پیرانہیں ہوجاتے،ہمارے عروج و بلندی کے لیے اگر کوئی زینہ ہے تو قرآن ہے۔کیوں کہ قرآن کریم انسان کے لیے مکمل ضابط حیات ہے جس میں انسان کیلئے ہدایت کیلئے ہر موضوع پر بحث کی گئی ہے، قرآنِ حکیم کا بنیادی مقصد انسان کے فکر ونظر اور عمل وکردارکی صحیح سمت متعین کرنا ہے۔
