اسلام آباد (آئی این پی ) افغان میڈیا کی اطلاعات کے مطابق چین نے پاکستان اور افغانستان کو ملانے کیلئے کوئٹہ ۔ کابل اور پشاور ۔ کابل ریلوے لائن بچھانے کی تجویز پیش کی ہے ۔یہاں جاری کئے جانیوالے ایک اعلامیہ میں کہا گیاہے کہ یہ تجویز چین کے نائب وزیر بیرونی امور کونگ شوان یو نے رواں ہفتے افغان صدر اشرف غنی کیساتھ ایک ملاقات کے دوران پیش کی ۔ شوان یو نے کہا کہ افغانستان چین کے اقتصادی بیلٹ کیلئے بنیادی اہمیت کا حامل ہے ۔انہوں نے پشاور ، کابل اور کوئٹہ ریلوے کے علاوہ اقتصادی راہداریوں اورعلاقائی تعاون کے بارے میں افغانستان ، چین اور پاکستان کے درمیان سہ فریقی مذاکرات شروع کرنے کی سفارش کی ، کوئٹہ ۔ کابل اور پشاور ۔کابل ریلوے لائنوں کی چینی تجویز کا خیرمقدم کرتے ہوئے اشرف غنی نے کہا کہ افغانستان پورے خطے کی ترقی اور خوشحالی کیلئے اپنے تمام ہمسایہ ممالک کے ساتھ اچھے مراسم اور دوستانہ تعلقات کا خواہاں ہے ۔