اسلام آباد(نیوزڈیسک)متنازعہ خبر،شاہ محمودقریشی کو اہم ذمہ داریاں سونپ دی گئیں،پی ٹی آئی کے چیئرمین عمران خان کی زیرصدارت میڈیا سٹریٹجی کمیٹی کے بنی گالہ میں منعقد ہونیوالے اجلاس میں متنازعہ خبر کے لیک ہونے کے معاملے کی تحقیقات کیلئے قائم کردہ کمیٹی سے متعلق مشترکہ قرارداد لانے کے لئے دیگر جماعتوں سے رابطوں کا ٹاسک شاہ محمود قریشی کو دے دیا گیاہے ۔ چیئرمین تحریک انصاف نے کہا کہ ساری اپوزیشن جسٹس ریٹائرڈ عامر رضا کی سربراہی میں قائم کردہ کمیٹی کو مسترد کر چکی ہے، اس کے بعد اب اس کمیٹی کی کوئی اہمیت نہیں رہی۔اجلاس میں جہانگیر ترین، اسد عمر، شاہ محمود قریشی، نعیم الحق اور شیریں مزاری سمیت مختلف رہنماؤں نے شرکت کی۔

اجلاس میں وزیر اعظم اور ان کے بچوں کے جمع کرائے گئے جوابات کا بھی جائزہ لیا گیا۔ سپریم کورٹ میں پاناما کیس کے مختلف نکات کے حوالے سے پارٹی رہنماؤں سے مشاورت کی گئی۔عمران خان نے کہا کہ پاکستان تحریک انصاف سپریم کورٹ میں پاناما لیکس کیس بھرپور انداز میں لڑے گی۔دریں اثناء متنازعہ خبر کے معاملے پر بنائی گئی کمیٹی نے تحقیقات کا آغاز کردیا ہے ۔کمیٹی 30 روز میں سفارشات مرتب کر کے وزیر داخلہ کو اپنی رپورٹ پیش کریگی وفاقی وزیر داخلہ چودھری نثار علی خان نے معاملے پر اب تک کی پیشرفت سے کمیٹی کے ارکان کو آگاہ کیا۔جمعرات کو پہلا اجلاس چیئرمین جسٹس ریٹائرڈ عامر رضا خان کی سربراہی میں منعقد ہوا

جس میں تحقیقات کے حوالے سے جائزہ لیا گیا ۔بعد ازاں وفاقی وزیر داخلہ چودھری نثارعلی خان نے کمیٹی کو بریفنگ دی ۔ رپورٹ کے مطابق وزیر داخلہ نے یہ بریفنگ کمیٹی کی درخواست پر دی ۔ وزیر داخلہ نے معاملے پر اب تک کی پیشرفت سے کمیٹی کے ارکان کو آگاہ کیا ، ذرائع کے مطابق وزیر داخلہ کی بریفنگ ایک گھنٹہ تک جاری رہی۔نجی ٹی وی کے مطابق کمیٹی حکومتی شخصیات ، سرکاری افسران کے بیان قلمبند کریگی اور یہ کمیٹی 30 روز میں سفارشات مرتب کر کے وزیر داخلہ کو اپنی رپورٹ پیش کریگی۔بعد ازاں وزیر داخلہ کمیٹی کی رپورٹ وزیراعظم کو پیش کرینگے۔

موضوعات:،شاہ محمودقریشی عمران خان متنازعہ خبر