کراچی (این این آئی) سابق رکن قومی اسمبلی نبیل گبول نے کہا ہے کہ میرے تحریک انصاف میں شمولیت کی خبروں میں کوئی صداقت نہیں۔ تحریک انصاف یا کسی اور جماعت میں شامل ہونا ہوتا تو کب کا ہوچکا ہوتا۔ اپنے ایک بیان میں انہوں نے کہا کہ کرپشن کے خلاف احتجاج میں عمران خان کا ساتھ دیا ہے۔ ضرورت پڑی تو کرپشن کے خلاف احتجاج میں بلاول بھٹو زرداری کے ساتھ بھی کھڑا ہوں گا۔ انہوں نے کہا کہ لیاری میرا گھر ہے۔ کسی بھی پارٹی شمولیت کا فیصلہ یہاں کے لوگوں کی مشاورت سے کروں گا۔ انہوں نے کہا کہ این اے 258 کے ضمنی انتخابات میں حمایت کے لئے حکیم بلوچ نے رابطہ نہیں کیا۔کس امیدوار کی حمایت کرنی ہے، گبول برادری میرے فیصلے کی منتظر ہے۔ ملیر کے ضمنی اتخابات میں امیدوار کی حمایت علاقہ کے لوگوں کی امنگوں کے مطابق کروں گا۔ انہوں نے کہا کہ بلاول بھٹو زرداری نے ہولی کی تقریب میں شریک ہوکر قائداعظم کے پاکستان کی عکاسی کی ہے۔

موضوعات:تحریک انصاف