اسلام آباد(آئی این پی) پاکستان تحریک انصاف کے مرکزی رہنما فیصل واڈا نے کہا ہے کہ مریم نواز کو وزیرا عظم ہاؤس سے رائے ونڈ محل لاہور بھیج دیا گیا جو تحریک انصاف کی پہلی فتح ہے‘دوسر ی کامیابی تب ملے گی جب وزیراعظم نواز شریف بھی یہاں سے چلے جائیں گے۔ وہ ہفتہ کو یہاں بنی گالا کے باہر میڈ یا سے گفتگو کررہے تھے۔ پی ٹی آئی کے رہنما نے کہا کہ مریم نواز کو وزیر اعظم ہا?س سے نکال کر رائیونڈ محل بھیج دیا گیا اس کامیابی پر تحریک انصاف کے کارکنوں مبارکباد دیتا ہوں۔ دوسر ی کامیابی تب ملے گی جب وزیراعظم نواز شریف بھی یہاں سے چلے جائیں گے۔انہوں نے کہا کہ آج جس طرح پہاڑوں کا سفر کرتے ہوئے بنی گالا پہنچے ہیں شائد وزیر اعظم ہاؤس بھی اسی طرح جانا پڑے ،ہم اس کے لیے تیار ہو گئے ہیں۔دریں اثناء وزیر اعظم کی صاحبزادی مر یم نواز نے تحر یک انصاف کے فیصل واڈا کے بیان کی تردید کردی۔ہفتے کے روز اپنے ٹویٹر پیغام میں مر یم نوازنے کہا کہ جھوٹ بولنے والوں کو ماضی کی رسوائی سے کچھ نہیں سیکھا میں اسلام آباد میں ہی ہوں۔یادرہے کہ اس سے قبل پاکستان تحریک انصاف کے رہنمافیصل واڈا وغیرہ نے دعوی کیا تھاکہ مریم نوازاسلام آباد سے چلی گئی ہیں۔