پشاور(این این آئی)وزیراعلیٰ خیبرپختونخوا پرویز خٹک نے صوبے کے مختلف محکموں کے اعلیٰ حکام کو ہدایت کی ہے کہ وہ اپنے محکموں میں سولر ائزیشن کیلئے پلان تیار کریں۔ انہوں نے اس سلسلے میں سٹرٹیجک سپورٹ یونٹ کے سربراہ صاحبزادہ سعید کو فوکل پرسن نامزد کیا۔ وہ پبلک ہیلتھ انجینئرنگ ، اریگیشن ، صحت ، تعلیم، صنعت اور دیگر محکموں کی ضروریات اور استعداد کو دیکھ کر سولرائزیشن پلان تیار کریں گے۔ وہ گزشتہ روز وزیراعلیٰ سیکرٹریٹ پشاور میں ڈیجٹیل ورلڈ انٹرنیشنل کمپنی سعودی عرب کے چیف ایگزیکٹیو آفیسر ندال طائف کی طرف سے دی گئی پریزینٹیشن اور اجلاس کی صدارت کر رہے تھے ۔ صوبائی وزیر برائے تعلیم و توانائی محمد عاطف خان ، مشیر برائے مواصلات و تعمیرات اکبر ایوب ، سیکرٹری توانائی ، چیف ایگز یکٹیو آفیسر ازدمک محسن سعید اور دیگر متعلقہ حکام بھی اس موقع پر موجود تھے۔ ندال طائف نے اجلاس کو کمپنی کے اغراض و مقاصد ، استعداد کار اور اسکی سرگرمیوں پر بریف کیا اور خیبرپختونخوا کے مختلف شعبوں میں سولرائزیشن کیلئے جامع تجویز پیش کی۔ انہوں نے شمسی توانائی کے استعمال کے فوائد، مجوزہ پیشکش کے تحت صوبائی محکموں میں توانائی کے دیر پا حل اور اس کے معاشی و سماجی اثرات سے آگاہ کیا۔ وزیراعلیٰ نے تجویز سے اتفاق کیا اور کمپنی کی پیشکش کو خوش آئند قرار دیا ۔ انہوں نے کہاکہ ہماری ضرورت بھی ہے اور ہم یہ منصوبے بہت جلد شروع کر سکتے ہیں۔ وزیراعلیٰ نے کہاکہ وہ توانائی کے مسئلے کے حل کیلئے پہلے سے مختلف منصوبوں پر کام شروع کر چکے ہیں۔ شمسی توانائی کے ذریعے توانائی کے بحران کو حل کرنے کیلئے بھی کوشاں ہیں ۔ وزیراعلیٰ نے کہاکہ قانونی پہلوؤں کو دیکھ کر اور اپنی استعداد کے مطابق فیصلہ کریں گے کہ ہم کتنا کام کر سکتے ہیں۔ انہوں نے متعلقہ حکام کو ہدایت کی کہ اپنے اپنے محکموں کی ضروریات اور استعداد کار کا جائزہ لیں۔انہوں نے شمسی توانائی کے مجوزہ منصوبوں کی تیاری مکمل کرکے ضرورت کے مطابق باضابطہ معاہدہ کرنے کا عندیہ دیا ۔

موضوعات:بجلی خیبرپختونخوا حکومت قومی گرڈ